उपमेयर डंगोलको आग्रह : ‘मेयर कोठामा बसेर आदेश दिन मिल्दैन’

काठमाडौं, चैत २१ गते । काठमाडौं महानगरपालिकाकी उपमेयर सुनिता डंगोलले मेयर बालेन शाहलाई कार्यालयमै आएर प्रशासनिक समस्या समाधान गर्न आग्रह गरेकी छन्। प्रमुख प्रशासकीय अधिकृत सरोज गुरागाईंको हाजिरीका विषयमा उत्पन्न विवादका बीच बिहीबार उनले मेयर शाहलाई कोठाबाट निर्देशन नदिन भन्दै प्रत्यक्ष रूपमा उपस्थित हुन आग्रह गरिन्।

उनले गुरागाईंलाई मन्त्रालयको आदेशअनुसार हाजिर गराउनु पर्ने उल्लेख गर्दै प्रशासनिक गतिरोध हटाउनु आवश्यक रहेको बताइन्। “तीन महिना भन्दा लामो समयसम्म प्रशासकीय प्रमुख कार्यालय आउन नपाउनु राम्रो होइन। कर्मचारीबीचको झडपले काठमाडौँ महानगरवासीलाई असर पुर्याइरहेको छ,” उनले भनिन्। उपमेयर डंगोलले यस विषयमा थप छानबिन गर्न सकिने भए पनि तत्काल कार्य अवरुद्ध गर्नु उचित नभएको बताउँदै, समाधानका लागि बोर्ड बैठक आह्वान गरिने जानकारी दिइन्। कार्यालय प्रवेशका क्रममा गुरागाईंलाई महानगर प्रहरीद्वारा रोक्ने प्रयास गरिएको थियो, तर कर्मचारी तथा जनप्रतिनिधिको सहयोगमा उनी कार्यकक्षमा प्रवेश गरेका थिए।