एनपीएलमा आज पोखरा एभेन्जर्स र सुदूरपश्चिम रोयल्स भिड्दै

काठमाडौं, कार्तिक ११ गते । नेपाल प्रिमियर लिग (एनपीएल) को तेस्रो संस्करणअन्तर्गत आज पोखरा एभेन्जर्स र सुदूरपश्चिम रोयल्सबीच प्रतिस्पर्धा हुँदैछ। कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने खेल नेपाली समयअनुसार साँझ ५ बजे सुरु हुनेछ। पोखराका लागि यस सिजनको यो पहिलो खेल हो। गत संस्करणमा ६ अंकसहित पाँचौँ स्थानमा प्रतियोगिता टुंग्याएको पोखरा यसपटक जितसहित अभियान सुरु गर्ने लक्ष्यमा छ।

लगातार दुई संस्करणको उपविजेता सुदूरपश्चिम रोयल्स भने यस सिजन पहिलो जितको खोजीमा मैदान उत्रनेछ। टोलीले गत कात्तिक ९ गते भएको उद्घाटन खेलमा साविक विजेता लुम्बिनी लायन्ससँग सात विकेटको हार बेहोरेको थियो। त्यसैले आजको खेल जित्दै अंकतालिकामा आफ्नो स्थिति सुधार्ने लक्ष्य सुदूरपश्चिमको हुनेछ।