बिमस्टेक एकताको प्रतीक, क्षेत्रीय सहकार्यलाई नेपालले दियो प्राथमिकता

काठमाडौं, चैत २१ गते ।परराष्ट्रमन्त्री डा. आरजु राणा देउवाले बिमस्टेक क्षेत्रीय एकता, बहुक्षेत्रीय प्राविधिक तथा आर्थिक सहकार्यलाई मजबुत बनाउन सामूहिक प्रयास आवश्यक रहेको बताएकी छन्। बैंककमा आयोजित छैठौं बिमस्टेक समिट अन्तर्गत २०औं मन्त्रिस्तरीय बैठकलाई सम्बोधन गर्दै उनले बिमस्टेकले बंगालको खाडी क्षेत्रका नागरिकहरूको साझा आकांक्षालाई प्रतिनिधित्व गर्ने भएकाले यसलाई प्रभावकारी बनाउन राजनीतिक इच्छाशक्ति जरुरी रहेको उल्लेख गरिन्। मन्त्री राणाले बिमस्टेकलाई एक उज्ज्वल इन्द्रेणीको संज्ञा दिँदै यस क्षेत्रको समृद्धि, सांस्कृतिक विविधता, इतिहास, पारिस्थितिकी प्रणाली र आर्थिक अवसरलाई उजागर गर्ने संगठनका रूपमा परिचालित हुनुपर्ने धारणा व्यक्त गरिन्।

नेपालले सन् २००४ मा सदस्यता लिएदेखि नै बिमस्टेक बडापत्र, सिद्धान्त र उद्देश्यप्रति प्रतिबद्ध रहेको भन्दै उनले क्षेत्रीय समृद्धि, शान्ति र एकतालाई नेपालले सधैं आत्मसात् गर्दै आएको बताइन्। बंगालको खाडी क्षेत्र जलवायु परिवर्तन, प्राकृतिक प्रकोप, वातावरणीय विनाश र प्रदूषणको असरबाट प्रभावित भएकाले पूर्वाधार निर्माण, विपद् व्यवस्थापन तथा वातावरणीय संरक्षणमा ध्यान दिनुपर्ने उनको सुझाव थियो। उनले भारतको अगुवाइमा प्रस्तावित बिमस्टेक विपद् व्यवस्थापन केन्द्रको स्वागत गर्दै कृत्रिम बुद्धिमत्ता (AI) को प्रयोगलाई प्राथमिकता दिनुपर्ने बताइन्। साथै, बिमस्टेक फ्री ट्रेड एरियाको सञ्चालन, व्यापार–पारवहन सहजीकरण, ऊर्जा साझेदारी, प्रविधि हस्तान्तरण, डिजिटल पूर्वाधार निर्माण र महिला सशक्तीकरणजस्ता विषयमा गहिरो सहकार्य आवश्यक रहेको बताउँदै, क्षेत्रीय सहकार्य र एकतामार्फत बिमस्टेकलाई एक सशक्त संगठनका रूपमा रूपान्तरण गर्नुपर्नेमा जोड दिइन्।