विश्व अटिजम जागरूकता दिवस मनाइँदै, स्वास्थ्य र शिक्षा पहुँचमा जोड

काठमाडौं, चैत २० गते ।  अटिजमसम्बन्धी सचेतना फैलाउने उद्देश्यले आज विश्वभर ‘अटिजम जागरूकता दिवस’ विविध कार्यक्रमसहित मनाइँदै छ। संयुक्त राष्ट्रसङ्घको आह्वानमा सन् २००७ देखि मनाउन थालिएको यो दिवस अटिजम भएका व्यक्तिहरूको मानवअधिकार र मौलिक स्वतन्त्रताको सुनिश्चितताका लागि समाजका सबै वर्गको सहकार्य आवश्यक छ भन्ने सन्देश दिन केन्द्रित छ।

संयुक्त राष्ट्रसङ्घका महासचिव एन्टोनियो गुटेरेसले यस दिवसका अवसरमा अटिजम भएका व्यक्तिहरूलाई स्वास्थ्य, शिक्षा तथा रोजगारीका अवसरहरू प्रदान गर्नुपर्ने आवश्यकता औंल्याएका छन्। दिगो विकास लक्ष्य (SDG) हासिल गर्न र स्वास्थ्यसम्बन्धी प्रतिबद्धता पूरा गर्न यस दिवसको महत्त्वपूर्ण भूमिका रहने उनको भनाइ छ। यस अवसरमा विश्वभर सचेतना अभियान, गोष्ठी तथा विभिन्न कार्यक्रमहरू आयोजना गरिँदै छन्।