बेपत्ता दलित बालिकाको खोजीमा आन्दोलन, राजमार्गमा चक्काजाम

जनकपुरधाम, चैत्र ९ गते । सुरुङ्गा नगरपालिका क्षेत्रमा १४ वर्षीया दलित बालिका एक सातादेखि बेपत्ता भएपछि स्थानीय बासिन्दा आन्दोलनमा उत्रिएका छन्। बालिकाको अवस्था सार्वजनिक गर्न माग गर्दै आफन्त र स्थानीयहरूले पूर्व–पश्चिम राजमार्गअन्तर्गत सुरुङ्गा नगरपालिका–८ करडबोनामा करिब तीन घण्टा चक्काजाम गरेका हुन्। सुरुङ्गा नगरपालिका–३ लक्ष्मीपुरकी ती बालिका सात महिनाकी गर्भवती रहेको बताइँदै आएको छ। आफन्तले प्रहरीमा किटानी जाहेरी दिए पनि पर्याप्त चासो नदेखाइएको आरोप स्थानीयको छ। प्रदर्शनका क्रममा इलाका प्रहरी कार्यालय अगाडि भेला भई दोषीलाई पक्राउ गर्न र निष्पक्ष छानबिन गर्न माग गरिएको थियो।

मानव अधिकारकर्मीहरूले घटनालाई गम्भीर सामाजिक अन्याय र नाबालिगमाथिको सम्भावित यौन शोषणसँग जोडिएको विषयका रूपमा लिएका छन्। स्थानीयका अनुसार बालिका विगत १० वर्षदेखि एक व्यक्तिको घरमा घरेलु कामदारका रूपमा बस्दै आएकी थिइन् र गर्भवती भएको खुलेपछि अचानक सम्पर्कविहीन बनाइएको आशंका गरिएको छ। यसैबीच जिल्ला प्रहरी कार्यालय सप्तरीका प्रवक्ता डिएसपी डम्बरबहादुर पुरीका अनुसार बालिकालाई उनकी दिदीले लगेको प्रारम्भिक सूचना प्राप्त भएको छ र खोजी कार्य जारी छ। बालिका फेला परेपछि स्वास्थ्य परीक्षण गरी आवश्यक कानुनी अनुसन्धान अघि बढाइने प्रहरीले जनाएको छ।