‘नौकरीको बदलामा जग्गा’ प्रकरण : सीबीआईले उज्यालो पारेको सुनियोजित मोडल, केन्द्रमा लालू यादव

एजेन्सी, माघ १८ गते ।  आरजेडी सुप्रिमो तथा बिहारका पूर्व मुख्यमन्त्री लालू प्रसाद यादवका लागि ‘नौकरीको बदलामा जग्गा’ प्रकरण बुढ्यौलीको अवस्थामा गम्भीर कानुनी संकट बनेको छ । यस प्रकरणमा लालू यादवको पूरै परिवार नै तानिएको छ । सीबीआईको गहिरो अनुसन्धानअनुसार यो कुनै आकस्मिक घटना नभई तत्कालीन रेलमन्त्री लालू यादवको कार्यकालमा सुनियोजित रूपमा सञ्चालन गरिएको कथित ‘मोडल’ हो ।

सीबीआईका अनुसार सरकारी भर्ती प्रक्रिया छलेर पटना आसपासका बहुमूल्य जग्गा ग्रुप–डी पदमा नियुक्तिको बदलामा लालू यादव परिवार वा उनीसँग सम्बन्धित कम्पनीहरूको नाममा सारिएको थियो । यस सम्पूर्ण प्रक्रियामा लालू यादवका तत्कालीन ओएसडी भोला यादवको ‘अपरेशनल रोल’ रहेको सीबीआईको दाबी छ । पटना क्याम्प कार्यालयका इन्चार्ज रहेका भोला यादवले जागिर चाहने उम्मेदवार, जग्गाधनी र रेलवेका उच्च अधिकारीबीच समन्वयकारीको भूमिका खेलेको अनुसन्धानमा खुलेको छ ।

अनुसन्धानका क्रममा लालू यादवको आवासबाट बरामद एक हार्ड डिस्क यस प्रकरणको सबैभन्दा महत्वपूर्ण प्रमाण बनेको छ । सो हार्ड डिस्कमा उम्मेदवारको नाम, सम्बन्धित रेलवे जोन र नियुक्तिको अवस्थासम्बन्धी विस्तृत विवरण रहेको सीबीआईले जनाएको छ । यसले यो कुनै छुट्टाछुट्टै कारोबार नभई योजनाबद्ध रूपमा ‘प्रोजेक्ट’ जस्तै सञ्चालन गरिएको देखाउँछ । क्याम्प कार्यालयका कर्मचारीहरूले पनि सूची भोला यादवको निर्देशनमा तयार हुने गरेको बयान दिएका छन् ।

सीबीआईको आरोपअनुसार तत्कालीन रेलमन्त्रीको अनौपचारिक ‘एमआर सेल’ (Minister of Railways Cell) ले विद्यमान सरकारी भर्ती प्रणालीलाई बेवास्ता गर्दै बिना विज्ञापन र आवश्यक प्रक्रिया महाप्रबन्धकहरूलाई दबाब दिई नियुक्ति अघि बढाएको थियो । अदालतको प्रारम्भिक बुझाइअनुसार योजना कार्यान्वयन भोला यादवले गरे पनि यस सम्पूर्ण प्रकरणको केन्द्रीय र निर्णायक भूमिका स्वयं लालू प्रसाद यादवकै रहेको देखिन्छ । रेलमन्त्रीको शक्ति र प्रभावबिनै विभिन्न रेलवे जोनमा यसरी नियुक्ति सम्भव नहुने अदालतको टिप्पणी छ ।