सप्तरीमा दियोबाट आगलागी : लाखौंको धनमाल जलेर नष्ट

जनकपुरधाम, माघ २ गते ।  सप्तरीको तिरहुत गाउँपालिका–१ धनपुरी टोलमा बिहीबार साँझ पूजाका लागि बालिएको दियोबाट आगलागी हुँदा स्थानीय योगेन्द्र यादवको एक घरसहित लाखौंको धनमाल जलेर नष्ट भएको छ।

यादवको बाँसको टाटीले बनेको फुसको छानो भएको एक कोठे घरमा दियोबाट अचानक आगो सल्किएको थियो। आगलागीबाट घरभित्र रहेको काठको दराज दुई थान, स्टिलको दराज एक थान, ३५ तोलाका विभिन्न चाँदीका गरगहना, तीन तोलाका सुनका मंगलसूत्र, अन्य गरगहना, नगद एक लाख २५ हजार रुपैयाँ, ४० मन धान, १० मन चामल तथा महत्त्वपूर्ण कागजात जलेर नष्ट भएको इलाका प्रहरी कार्यालय कञ्चनपुरका प्रहरी नायब उपरीक्षक माधवप्रसाद काफ्लेले जानकारी दिएका छन्।

उहाँका अनुसार आगलागीबाट घरसहित करिब ६ लाख रुपैयाँ बराबरको क्षति भएको छ। आगलागी प्रहरी कञ्चनरुप नगरपालिकाको दमकल तथा स्थानीय बासिन्दाको सहयोगमा साँझ ७ बजे पूर्ण रूपमा नियन्त्रणमा आएको थियो।

यो घटनाले जाडो याममा पूजा–आरती वा दियो बाल्दा हुने जोखिमलाई फेरि उजागर गरेको छ। स्थानीय बासिन्दाहरूले यस्ता घटनाबाट बच्न सावधानी अपनाउनुपर्ने सुझाव दिएका छन्। पीडित परिवारलाई राहत तथा सहयोगका लागि स्थानीय निकाय र समुदायले ध्यान दिनुपर्ने देखिएको छ।