बिहारमा पहिलो चरणको मतदान सुरु, बिहान ११ बजेसम्म २७.६५ प्रतिशत मतदाताले गरे मतदान

एजेन्सी, कार्तिक २० गते ।  बिहार विधानसभाको पहिलो चरणअन्तर्गत बिहीबार बिहान ७ बजेदेखि १८ जिल्लाका १२१ निर्वाचन क्षेत्रमा मतदान सुरु भएको छ। पटना, दरभंगा, सहरसा, मधेपुरा, मुजफ्फरपुर, वैशाली, गोपालगंज, सीवानलगायतका जिल्लाहरूमा मतदाताहरू उत्साहपूर्वक मतदानमा सहभागी भइरहेका छन्। निर्वाचन आयोगले मतदाताको सहजता र पारदर्शिताका लागि वेबकास्टिङ, ईभीएम नेट एपमार्फत प्रतिवेदन प्रणाली र नयाँ मतदाता सूचना पत्रजस्ता प्रविधिमुखी सुधारहरू लागू गरेको छ।

निर्वाचन आयोगका अनुसार बिहान ११ बजेसम्म २७.६५ प्रतिशत मतदान सम्पन्न भइसकेको छ। प्रमुख नेताहरूले समेत आफ्ना क्षेत्रबाट मताधिकार प्रयोग गरेका छन्। प्रधानमन्त्री नरेन्द्र मोदी, मुख्यमन्त्री नितीश कुमार र आरजेडी नेता तेजस्वी यादवले मतदातालाई लोकतन्त्रको यो पर्वमा सहभागी हुन आह्वान गरेका छन्। देशभरका मतदाताहरूमा विशेषगरी महिला र युवाहरूको सहभागिता उल्लेखनीय देखिएको छ, जसले चुनावी माहोललाई उत्साहपूर्ण बनाएको छ।