मैथिली ठाकुरको राजनीतिक यात्रा सुरु: भाजपामा प्रवेश, अलीनगरबाट उम्मेदवार बन्ने चर्चा

एजेन्सी, असोज २८ गते ।  लोकप्रिय मैथिली गायिका मैथिली ठाकुर शनिबार पटनास्थित भारतीय जनता पार्टी (भाजपा) कार्यालयमा आयोजित विशेष कार्यक्रममा औपचारिक रूपमा पार्टीमा प्रवेश गरेकी छन्। उनीसँगै केही अन्य व्यक्तिहरूले पनि पार्टी सदस्यता ग्रहण गरेका छन्। पछिल्ला केही हप्तादेखि उनको राजनीतिमा प्रवेशबारे चलिरहेको चर्चा अब पुष्टि भएको छ।

स्रोतका अनुसार, भाजपा नेतृत्वले उनलाई आउँदो बिहार विधानसभा निर्वाचनमा दरभङ्गाको अलीनगर क्षेत्रबाट उम्मेदवार बनाउने तयारी गरेको छ। अलीनगरका हालका भाजपा विधायक मिश्री लाल यादवले राजीनामा दिएपछि उक्त क्षेत्र रिक्त भएको छ, जसले मैथिली ठाकुरको उम्मेदवारीको सम्भावना थप प्रबल बनाएको छ।

भाजपामा प्रवेश गर्नु अघि, मैथिलीले पार्टीका वरिष्ठ नेता विनोद तावडे र केन्द्रीय मन्त्री नित्यानन्द रायसँग भेट गरेर आफ्नो राजनीतिक यात्राको संकेत दिएकी थिइन्। उनले मिडियासँग भनिन् — “मेरो आत्मा बिहारसँग गहिरो रूपमा जोडिएको छ, म यसको विकासका लागि केही योगदान दिन चाहन्छु।”

भाजपाले मैथिली ठाकुरको मिथिला क्षेत्रमा व्यापक लोकप्रियतालाई उपयोग गर्दै आगामी चुनावमा प्रचार अभियानको प्रमुख चेहरा बनाउने योजना बनाएको बताइएको छ। संगीत र राजनीतिबीचको यो नयाँ संगमले मिथिलाञ्चलमा नयाँ राजनीतिक आकर्षण ल्याउने अनुमान गरिएको छ।