महागठबन्धनमा ‘सीट संकट’ गहिरिँदै — कांग्रेसको अल्टिमेटम, ‘आज या कहिल्यै होइन’

एजेन्सी, असोज २७ गते । बिहार विधानसभा चुनाव नजिकिँदै जाँदा महागठबन्धनमा सीट बाँडफाँटको विवाद चर्किंदै गएको छ। एनडीएले आफ्नो सीट बाँडफाँटको घोषणा गरेपछि विपक्षी गठबन्धन राजद, कांग्रेस र वीआईपीबीच तनाब झनै तीव्र बनेको छ।

कांग्रेसले आरजेडीका नेता तेजस्वी यादवलाई स्पष्ट चेतावनी दिएको छ — “वीआईपीको मसला आज नै सुल्झाओ, होइन भने हामी आफ्नै बाटो जानेछौं।” पार्टीले आज साँझसम्म सीटहरूको घोषणा गर्ने तयारी समेत गरेको छ।

कांग्रेसका शीर्ष नेताहरू — प्रदेश अध्यक्ष राजेश राम, प्रभारी कृष्णा अल्लावरु, शकील अहमद खान र मदनमोहन झा — छलफलका लागि दिल्ली पुगेका छन्। उनीहरूका अनुसार पहिलो चरणको निर्वाचन नजिकिँदै गरेकोले अब ढिलाइको ठाउँ छैन।

कांग्रेसका सूत्रका भनाइमा, यदि वीआईपीका अध्यक्ष मुकेश सहनीसँग सहमति भयो भने ५६ सीटमा उम्मेदवार घोषणा गरिनेछ, नभए पार्टीले आजै ७० सीटमा उम्मेदवार उतार्ने निर्णय गर्नेछ। सहमति भएपछि चाहिँ नामहरू फिर्ता लिन सकिने विकल्प खुला रहने बताइएको छ।

उता, मुकेश सहनीका तेवर पनि कडा बनेका छन्। दिल्ली प्रस्थान अघि उनले व्यङ्ग्य गर्दै भने, “महागठबन्धनको स्वास्थ्य खराब छ, म उपचारका लागि दिल्ली जाँदैछु।” सहनीले सीट संख्या मात्र होइन, उपमुख्यमन्त्री पदको दाबी समेत गरेका छन्।

त्यस्तै, राजदले सीमांचलका केही क्षेत्रमा कांग्रेससँगको आँखा जुधाइ बढाएको छ। कांग्रेसले वैशाली, कहलगाउँ लगायतका क्षेत्रमा पनि आफ्नो दाबी मजबूत बनाउँदैछ।

राजदका स्रोतका अनुसार नेता प्रतिपक्ष तेजस्वी यादव अहिले गठबन्धन विस्तार र अन्तिम सहमतिको प्रयासमा छन्। उनले कांग्रेस र वीआईपीसँगै आईपी गुप्तासँग पनि छलफल अघि बढाएका छन्।

राजनीतिक विश्लेषकहरूको भनाइमा, महागठबन्धनभित्रको यो ‘सीट युद्ध’ अब निर्णायक मोडमा पुगेको छ — आज साँझको निर्णयले नै गठबन्धनको भविष्य तय गर्नेछ।