सीतामढीमा आपराधिक हमला, युवकलाई गोली प्रहार

एजेन्सी, असोज १ गते । सीतामढी जिल्लाको महिन्दवारा थाना क्षेत्रअन्तर्गत रून्नीसैदपुर–बेलसण्ड सडकखण्डमा रामपुर गाउँ नजिक अपराधीहरूको समूहले एक युवकलाई गोली हानेर गम्भीर घाइते बनाएका छन् । तीन मोटरसाइकलमा आएका नौ जना मध्येका अपराधीहरूले ३५ वर्षीय ललित मण्डललाई जबरजस्ती मोटरसाइकलबाट उतारी गोली प्रहार गरेका हुन् । स्थानीयवासीका अनुसार घटनास्थलमा पाँच राउन्डसम्म गोली चलेको थियो । गम्भीर घाइते मण्डललाई प्रारम्भिक उपचारपछि सामुदायिक स्वास्थ्य केन्द्र, रून्नीसैदपुरमार्फत मुजफ्फरपुरस्थित एसकेएमसीएच अस्पताल रेफर गरिएको छ, जहाँ उनी जीवन–मृत्युबीच संघर्षरत छन् ।

घटनाले सीतामढीमा अपराध बढ्दो अवस्थामा पुगेको स्पष्ट पारेको छ । प्रहरीले प्रारम्भिक अनुसन्धान अघि बढाइरहेको भए पनि घाइते ललित मण्डलको पुरानो आपराधिक पृष्ठभूमि रहेको र उनी हत्या लगायतका मुद्दामा संलग्न रहेको जानकारी आएको छ । अपराधीहरूको यस्तो निर्भीक गतिविधिले स्थानीय क्षेत्रमा त्रास सिर्जना गरेको छ भने सुरक्षाप्रति गम्भीर प्रश्न पनि उठेको छ ।