एनडीएमा सिट बाँडफाँटको तनाव, चिराग पासवानको रणनीतिले गठबन्धनमा खैलाबैला

एजेन्सी, भदौ १६ गते ।  बिहार विधानसभा चुनाव २०२५ को लागि राष्ट्रिय जनतान्त्रिक गठबन्धन (एनडीए) भित्र सिट बाँडफाँटलाई लिएर तनाव बढ्दै गएको छ। लोक जनशक्ति पार्टी (रामविलास) का नेता चिराग पासवानले सुरुमा ४० सिटको माग गरेका थिए, तर हालै उनका सांसद अरुण भारतीले २४३ सिटमै लड्ने दाबी गरेपछि एनडीएका रणनीतिकारहरूको होसहवास उडेको छ। भारतीले ४३ देखि १३५ सिटको मागलाई जायज ठहराउँदै २०१५ मा ४३ र २०२० मा १३७ सिटमा लडिएको इतिहास पेश गरेका छन्। गत लोकसभा चुनावमा १०० प्रतिशत सफलता हासिल गरेको लोजपा (आर) को यो मागले जनता दल (युनाइटेड) र भारतीय जनता पार्टी (भाजपा) लाई समेत दबाबमा पारेको छ।

लोजपा (आर) को मागले एनडीए गठबन्धनभित्र जटिलता थपिएको छ। चिराग पासवानले आफ्ना विश्वासपात्र नेताहरू जस्तै राजू तिवारी, हुलास पाण्डेय, संजय पासवानलगायतका लागि मनपर्ने सिटहरू सुनिश्चित गर्न खोजिरहेका छन्। यता, जदयू र भाजपाले गठबन्धनका अन्य साना दलहरू जस्तै हिन्दुस्तानी आवाम मोर्चा र राष्ट्रिय लोक मोर्चालाई पनि समायोजन गर्नुपर्ने बाध्यता छ। लोजपा (आर) को यो अडानले गठबन्धनको रणनीतिमा नोक्सान पुग्न सक्ने आशंका छ। महागठबन्धनमा जाने सम्भावना पनि कमजोर देखिन्छ, किनकि त्यहाँ पनि सिट बाँडफाँटमा सहमति जटिल छ। सिट बाँडफाँटको यो गाँठो कसरी फुक्छ, त्यो हेर्न बाँकी छ।