मन्त्री फिर्ता नहुँदा जसपा र लोसपा सरकारबाट बाहिरिने तयारीमा

काठमाडौं, भदौ १३ गते ।  सरकारमा पठाइएका मन्त्रीले पार्टी निर्णय नटेरेपछि जनता समाजवादी पार्टी (जसपा) र लोकतान्त्रिक समाजवादी पार्टी (लोसपा) सरकारबाट बाहिरिने तयारीमा पुगेका छन्। मन्त्रीहरूलाई फिर्ता बोलाउने औपचारिक निर्णय भए पनि उनीहरूले राजीनामा दिन अस्वीकार गरेपछि दुवै दलले असन्तुष्टि जनाएका हुन्। तर, दुवै दलले समर्थन भने कायम राख्ने प्रस्ट पारेका छन्।

जसपाले गत ७ भदौमा महिला, बालबालिका तथा ज्येष्ठ नागरिकमन्त्री नवलकिशोर साह र खानेपानीमन्त्री प्रदीप यादवलाई फिर्ता बोलाउने निर्णय गरेको थियो। ८ भदौमा पार्टीले सांसद डा. वीरेन्द्र महतो र रञ्जु झालाई नयाँ मन्त्रीका लागि सिफारिससमेत गरेको थियो। त्यस्तै, लोसपाले श्रममन्त्री शरतसिंह भण्डारीलाई फिर्ता बोलाएर सर्वेन्द्रनाथ शुक्लालाई पठाउने तयारी गरेको थियो। तर मन्त्रीहरूले राजीनामा नदिँदा दुबै दल अब सरकारबाट बाहिरिने निष्कर्षमा पुगेका छन्।