नेपालमार्ग हुँदै भारत प्रवेश गरेको भनिएका पाकिस्तानी नागरिक मलेसिया पुगेको पुष्टि

काठमाडौं, भदौ १३ गते ।  अध्यागमन विभागले हालै भारतीय सञ्चारमाध्यमले गरेको दाबीलाई खण्डन गर्दै नेपालमार्ग हुँदै भारत प्रवेश गरेको भनिएका तीन पाकिस्तानी नागरिक मलेसिया पुगेको स्पष्ट पारेको छ। विभागका अनुसार पाकिस्तानी नागरिक हसनैन अली र आदिल हुसैन अगस्ट ८ मा नेपाल प्रवेश गरेका थिए र १५ अगस्टमा मलेसिया उडेका थिए। त्यस्तै, मोहम्मद उस्मान १० अगस्टमा नेपाल आएका थिए र २४ अगस्टमा मलेसिया गएको प्रमाणित भएको छ।

यसअघि भारतीय सञ्चारमाध्यमहरूले जैस–ए–मोहम्मद समूहसँग संलग्न भनिएका ती तीन जना बिहार प्रदेश प्रवेश गरेको दाबी गरेका थिए, जसपछि भारतले सीमामा सुरक्षा सतर्कता कडाइ गरेको थियो। तर अध्यागमन विभागले यात्राको आधिकारिक विवरण सार्वजनिक गर्दै उनीहरू दुबई हुँदै नेपाल भित्रिएर केही दिन बसि मलेसिया गएको जनाएको छ। विभागले भारत प्रवेशको कुनै प्रमाण नभएको भन्दै यसबारे बाहिर आएको हल्लाप्रति विश्वास नगर्न आग्रह गरेको छ।