तेजस्वी यादवको कटाक्ष : बिहारमा ‘जीजा आयोग’ र ‘मेहरारू आयोग’ बनाउने सुझाव

एजेन्सी,, असार ३ गते । बिहार विधानसभा विपक्षका नेता तेजस्वी यादवले राज्य सरकारद्वारा गठित आयोगमा सत्तारुढ नेताका आफन्तहरू नियुक्त गरिएको भन्दै तीव्र आलोचना गरेका छन्। मंगलबार पटनामा पत्रकारहरूसँग कुरा गर्दै उनले व्यङ्ग्य गर्दै भने— "अब त बिहारमा जीजा आयोग, जमाई आयोग अनि मेहरारू आयोग नै गठन गर्नुपर्ने अवस्था आएको छ।"

मुख्यमन्त्री नितीश कुमार निकट नेताहरूलाई ‘भूँजा पार्टी’ भन्दै आलोचना गरेका यादवले मुलुकमा बेरोजगारी, महँगी र गरिबी चुलिंदै जाँदा सरकार गम्भीर नदेखिएको आरोप लगाए। प्रधानमन्त्री मोदीमाथि पनि उनले कटाक्ष गर्दै भने, “रासन बाँडेरै देश चलाउँछु भन्ने मानसिकता ठीक होइन। शिक्षा, रोजगार र जागिरजस्ता मुद्दामाथि पनि सरकारको ध्यान जानु आवश्यक छ।” बिहारमा आयोगहरू स्पेशल अरेन्जमेन्टका आधारमा बनाईएका भन्दै उनले 'परिवारवाद'को वास्तविकता यहीँ आएर हेर्न प्रधानमन्त्रीलाई सुझाएका छन्।