चीनमा क्यान्सर उपचारमा क्रान्ति: सस्तो र प्रभावकारी ‘अन्कोलाइटिक भाइरस थेरापी’

काठमाडौं, चैत १९ गते । क्यान्सर घातक रोग हो, जसको उपचार महँगो र जटिल रहँदै आएको छ। तर, चीनका वैज्ञानिकहरूले ‘अन्कोलाइटिक भाइरस थेरापी’ नामक प्रविधि विकास गरेका छन्, जसले क्यान्सर उपचारलाई सहज, प्रभावकारी र किफायती बनाउने अपेक्षा गरिएको छ। यो प्रविधिले क्यान्सर ट्यूमरलाई नष्ट गर्नाका साथै शरीरको रोग प्रतिरोधात्मक क्षमतालाई सक्रिय बनाउने वैज्ञानिकहरूको दाबी छ। चिनियाँ अनुसन्धानकर्ताहरूले आनुवंशिक रूपमा परिमार्जित भाइरस प्रयोग गरी क्यान्सर कोशिकाहरूमा सिधै प्रवेश गराई तिनलाई समाप्त पार्ने प्रविधि विकास गरेका छन्। साथै, यसले प्रतिरक्षा प्रणालीलाई अझ सशक्त बनाउँदै बाँकी क्यान्सर कोशिकाहरू नष्ट गर्न मद्दत गर्ने प्रोटिनहरू उत्पन्न गर्छ।

यो प्रविधिको अनुसन्धान झन्डै १०० वर्षअघि नै सुरु भएको भए पनि पछिल्ला वर्षहरूमा आनुवंशिक इन्जिनियरिङका कारण यसमा उल्लेखनीय सुधार आएको छ। अमेरिका, जापानलगायतका देशहरूले यो प्रविधि अपनाइसकेका छन् भने चीनले तीव्र विकास गरिरहेको छ। गुआङ्सी मेडिकल युनिभर्सिटीका प्रोफेसर झाओ योङक्सियाङको नेतृत्वमा ६० भन्दा बढी क्लिनिकल ट्रायल भइरहेका छन्, जसले यो उपचार सर्वसाधारणका लागि सुलभ बनाउने आशा गरिएको छ। हाल चीनमा क्यान्सरको परम्परागत उपचार सीआरटी थेरापीको लागत प्रति डोज १ लाख ४० हजार अमेरिकी डलरसम्म पर्ने गरे पनि अन्कोलाइटिक भाइरस थेरापीको इन्जेक्सन केवल १४० अमेरिकी डलर (नेपाली झन्डै १९ हजार रुपैयाँ) मा उपलब्ध हुन सक्ने अनुमान गरिएको छ। यसरी, एक वर्षको सम्पूर्ण उपचार लागत मात्र ४,२०० अमेरिकी डलर पर्नेछ, जसले यो प्रविधि क्यान्सर रोगीहरूका लागि क्रान्तिकारी उपलब्धि बन्ने विश्वास गरिएको छ।