श्रम तथा यातायात मन्त्री राय लाई दोश्रो पटक स्पष्टिकरण सोधियो

जनकपुरधाम, चैत १४ गते । सर्लाही जिल्ला निर्वाचन क्षेत्र नं. २ का क्षेत्रीय सभापति, २(ख) बाट निर्वाचित प्रदेश सभा सदस्य र वर्तमान प्रदेश सरकारका श्रम तथा यातायात मन्त्रीको रुपमा बहाल रहेको कौशल किशोर राय लाई पार्टीको मर्यादा र अनुशासनको पालन नगरेको आरोप लगाइएको छ। संघीय निर्वाचनदेखि हालसम्म अन्य विचारधाराका राजनैतिक कर्मी र नेताहरूको कार्यक्रमहरूमा भाग लिँदै, पार्टी र प्रमुख नेताहरूलाई अनावश्यक आरोप र गालीगलौज गर्ने कार्यमा संलग्न भएको आरोप लगाइएको छ। यसरी पार्टीको नाम बदनाम गरि संगठनलाई कमजोर पार्ने कार्यलाई पार्टीका मर्यादा र अनुशासन विपरीत ठहरिएको छ।

यस विषयमा सर्लाही क्षेत्र नं. ४ का क्षेत्रीय कार्यसमितिबाट यथास्थित प्रमाण सहित उजुरी प्राप्त भएको हो। त्यसपछि, पार्टीको विधान अनुसार सात दिन भित्र लिखित जवाफ पेश गर्न आग्रह गरिएको थियो। तथापि, अहिले सम्म त्यस पत्रको कुनै जवाफ प्राप्त भएको छैन। त्यसैले, पार्टी अनुशासन समितिले दोस्रो पटक यो पत्र पठाउँदै, तीन दिन भित्र स्पष्टिकरण पेश गर्न निर्देशन दिएको छ। नेपाली काँग्रेस जिल्ला कार्य समिति सर्लाहीले निजको कार्य सम्पादन माथि पटक–पटक प्रश्न उत्पन्न गर्दै समय–समयमा सचेत समेत गराउँदै आएको श्रोतको भनाई छ ।