पूर्वाधार विकासलाई उद्यमशीलता र रोजगारीसँग जोड्नुपर्ने मन्त्री भण्डारीको सुझाव

जनकपुरधाम, चैत ११ गते । श्रम, रोजगार तथा सामाजिक सुरक्षामन्त्री शरत सिंह भण्डारीले भौतिक पूर्वाधार विकासलाई उद्यम, उत्पादन, र रोजगारीसँग जोड्न नसक्दा नागरिकले विकासको अनुभूति गर्न नसकेको बताएका छन्। ‘घरघरमा सडक, पानी, बिजुली पुगे पनि नागरिक सन्तुष्ट छैनन्,’ भन्दै उनले मुलुकमा नैराश्यता र गलत भाष्य निर्माण भएको उल्लेख गरे। यो अवस्था चिर्न पूर्वाधारमा आधारित उद्यमशीलता र रोजगारीका अवसर सिर्जना गर्नुपर्ने उनको धारणा छ। विदेशबाट फर्केका दक्ष जनशक्तिको सीप र श्रमलाई सदुपयोग गर्दै आर्थिक समृद्धि हासिल गर्नुपर्ने बेला आएको उनले बताए।

महोत्तरीको बर्दिबास नगरपालिकाले आयोजना गरेको ‘१ हजार दिनको उपलब्धि’ सार्वजनिक कार्यक्रममा मन्त्री भण्डारीले बर्दिबासलाई क्षेत्रीय विकासको केन्द्र बनाउने दृष्टिकोण अघि सार्नुपर्ने बताए। भिठ्ठामोड–बर्दिबास–खुर्कोट हुँदै चीन जोड्ने सडक र पूर्व–पश्चिम विद्युतीय रेलमार्गको जक्सनका कारण बर्दिबासको रणनीतिक महत्त्व बढेको उल्लेख गर्दै उनले नेपाललाई भारत र चीन जोड्ने सेतुका रूपमा विकास गर्ने समय आएको बताए। साथै, सरकारले आगामी दशकलाई ‘रोजगारीको दशक’ को रूपमा मनाउने प्रतिबद्धता व्यक्त गर्दै तालिम तथा सीप विकास कार्यक्रमलाई प्रभावकारी बनाउने योजनाबारे जानकारी गराए।