सांसद अमरेशकुमार सिंहविरुद्ध परराष्ट्रमन्त्री आरजु राणाको मुद्दा पेसीमा

काठमाडौं, चैत ५ गते । परराष्ट्रमन्त्री तथा नेपाली कांग्रेसकी सांसद आरजु राणा देउवाले स्वतन्त्र सांसद अमरेशकुमार सिंहविरुद्ध दायर गरेको गाली बेइज्जती मुद्दा जिल्ला अदालत काठमाडौँमा पेसीमा चढेको छ। मंगलबार न्यायाधीश माधवप्रसाद अधिकारीको इजलासमा मुद्दाको पेसी तोकिएको हो। राणाले २०८० जेठ २४ गते सिंहविरुद्ध गाली बेइज्जती सम्बन्धी मुद्दा दायर गरेकी थिइन्।

सांसद सिंहले राणालाई नक्कली शरणार्थी प्रकरणमा मुछिएको भ्रष्ट महिला भएको टिप्पणी गरेपछि राणाले जिल्ला अदालतमा आफू माथि गाली बेइज्जती गरिएको दाबी गर्दै कानुनी कारबाहीको माग गरेकी थिइन्। यसअघि २०८१ जेठ २२ गते जिल्ला अदालतका न्यायाधीश कमलप्रसाद पोखरेलको इजलासले मुद्दालाई मेलमिलापमा पठाउने आदेश दिएको थियो।

तर मेलमिलाप प्रक्रिया सफल हुन नसकेपछि मुद्दा पुनः अदालतमा फर्किएको हो। अब अदालतले मुद्दामाथि थप सुनुवाइ गर्नेछ।