काठमाडौँका ८ क्याम्पसमा स्ववियु निर्वाचन स्थगित

काठमाडौं, चैत ५ गते । काठमाडौँ उपत्यकाका ८ वटा आङ्गिक क्याम्पसहरूमा स्ववियु निर्वाचन स्थगित भएको छ। त्रिभुवन विश्वविद्यालय अन्तर्गत २२ आङ्गिक क्याम्पसमध्ये ८ वटामा तालाबन्दीका कारण निर्वाचन रोकिएको हो। त्रिविले आजका लागि ६२ वटा आङ्गिक क्याम्पस र सम्बन्धनप्राप्त कलेजहरूमा निर्वाचनको मिति तोकेको थियो।

रत्नराज्यलक्ष्मी क्याम्पस (आरआर) र अमृत साइन्स क्याम्पसमा अन्तिम समयमा आएर तालाबन्दी भएपछि निर्वाचन रोकिएको छ। त्यस्तै, सरस्वती क्याम्पस, विश्वभाषा क्याम्पस, नेपाल ल क्याम्पस, शंकरदेव क्याम्पस, त्रिचन्द्र क्याम्पस, र पब्लिक युथ क्याम्पस मा यसअघि नै निर्वाचन प्रक्रिया रोकिएको थियो। विद्यार्थी संगठनहरूबीचको विवादका कारण निर्वाचन प्रभावित भएको हो।

त्रिवि केन्द्रीय क्याम्पसमा ८ गतेका लागि निर्वाचन सारिएको छ भने पद्मकन्या क्याम्पस बागबजारमा ७ गतेका लागि तोकिएको छ। यद्यपि, थापाथली इन्जिनियरिङ कलेज, पुल्चोक इन्जिनियरिङ क्याम्पस, भक्तपुर बहुमुखी क्याम्पस, नेपाल कर्मस क्याम्पस, महाराजगन्ज चिकित्सा क्याम्पस लगायतका संस्थाहरूमा भने निर्वाचन प्रक्रिया सुचारु रहेको छ।