एमालेको काठमाडौंमा शक्ति प्रदर्शन: सुशासन र समृद्धिको सन्देश

काठमाडौं, मंसिर ७। सत्तारूढ नेकपा एमालेले सुशासन, मुलुकको समृद्धि र सुदृढ लोकतन्त्रको सन्देश प्रवाह गर्न शुक्रबार काठमाडौंमा भव्य जागरण सभा आयोजना गर्ने तयारी गरेको छ। पार्टीले यस अवसरलाई शक्ति प्रदर्शनको रुपमा उपयोग गर्दै जनतामा सकारात्मक सन्देश पुर्‍याउने उद्देश्य राखेको छ।

जागरण सभामा कार्यकर्ता र समर्थक गरी करिब एक लाख सहभागी उतार्ने लक्ष्य लिएको एमालेले कार्यक्रममा नेतृत्वको जिम्मा बागमती प्रदेश अध्यक्ष कैलाश ढुंगेललाई सुम्पेको छ। भद्रकालीबाट सुरू हुने जुलुस न्युरोड गेट, वीर अस्पताल, रत्नपार्क हुँदै दरबारमार्गको सडकमा सभामा परिणत हुने योजना रहेको जनाइएको छ।