भारतले ७८औँ स्वतन्त्रता दिवसमा नेपाललाई ६६ स्कुल बस र ३५ एम्बुलेन्स उपहारस्वरूप प्रदान गर्‍यो

काठमाडौं,साउन ३१ गते । भारतले आफ्नो ७८औँ स्वतन्त्रता दिवसको अवसरमा नेपाललाई ६६ स्कुल बस र ३५ एम्बुलेन्स उपहारस्वरूप प्रदान गरेको छ। भारतीय दूतावासले विशेष समारोहको आयोजना गर्दै यी स्कुल बस र एम्बुलेन्स नेपाललाई हस्तान्तरण गरेको हो। स्वतन्त्रता दिवसको अवसरमा प्रत्येक वर्ष नेपाललाई सहयोगस्वरूप एम्बुलेन्स र स्कुल बस उपलब्ध गराउँदै आएको भारतले हालसम्म १,००९ एम्बुलेन्स र ३०० स्कुल बस प्रदान गरिसकेको छ। पछिल्लो एक वर्षमा भारतीय सहयोगमा नेपालमा २५ परियोजना उद्घाटन गरिएको, ६ परियोजनामा हस्ताक्षर भएको र ९ परियोजनाको शिलान्यास गरिएको भारतीय दूतावासले जानकारी दिएको छ।