आदिकवि भानुभक्तको २१३औँ जन्मजयन्ती आज मनाइँदै, नेपाली भाषा र साहित्यमा योगदानको स्मरण

काठमाडौं, असार २९ गते । आदिकवि भानुभक्त आचार्यको २१३औँ जन्मजयन्ती आज देश तथा विदेशमा विभिन्न कार्यक्रम गरी मनाइँदैछ। संस्कृत भाषामा रहेको रामायणलाई नेपाली भाषामा भावानुवाद गरी नेपाली समाजमा पुर्‍याएका भानुभक्तले भाषा, साहित्य र संस्कृतिको क्षेत्रमा ऐतिहासिक योगदान पुर्‍याएका छन्। उनको नेपाली रामायण आज पनि नेपाली घरघरमा श्रद्धापूर्वक पाठ गरिन्छ।

विसं १८७१ असार २९ गते तनहुँको चुँदीरम्घामा जन्मिएका भानुभक्तका ‘रामायण’, ‘वधुशिक्षा’, ‘प्रश्नोत्तर’, ‘भक्तमाला’ र ‘रामगीता’ लगायतका कृति प्रसिद्ध छन्। भानु जयन्तीका अवसरमा प्रतिमामा माल्यार्पण, प्रभातफेरी तथा साहित्यिक कार्यक्रम आयोजना गरिँदैछ। नेपालसँगै भारतको दार्जिलिङ, सिक्किम, भुटानलगायत नेपाली भाषाभाषी क्षेत्रमा पनि उनको जन्मजयन्ती मनाइँदैछ।