सञ्चारगृहको गेटमै शंकास्पद पार्किङ, पत्रकार महासंघद्वारा छानबिन र कारबाहीको माग

काठमाडौं, असार २९ गते । नेपाल पत्रकार महासंघले विभिन्न सञ्चारमाध्यमका कार्यालय गेटमै शंकास्पद रूपमा सवारीसाधन पार्किङ गरी पत्रकारलाई सञ्चारकर्ममा जान अवरोध सिर्जना गरिएको घटनाप्रति गम्भीर ध्यानाकर्षण जनाएको छ। महासंघका अनुसार सोमबार बिहान ७ बजेदेखि तीनकुनेस्थित कान्तिपुर पब्लिकेशन, नयाँबानेश्वरस्थित अनलाइनखबर र मध्यबानेश्वरस्थित हिमालय टेलिभिजनको कार्यालय गेटमा सवारीसाधन राखेर पत्रकारको आवतजावतमा समस्या पुर्‍याइएको थियो।

महासंघले तत्काल अवरोध हटाई सञ्चारकर्मी र सञ्चारगृहको सुरक्षा सुनिश्चित गर्न सम्बन्धित निकायसँग माग गरेको छ। साथै सञ्चारमाध्यम र पत्रकारको अधिकारमा अवरोध पुर्‍याउने घटनाको तत्काल छानबिन गरी दोषीमाथि आवश्यक कानुनी कारबाही गर्न आग्रह गरेको छ। अवरोध हटाउन सुरक्षा निकायसँग समन्वय भइरहेको महासंघले जनाएको छ।