अहिंसा र शान्तिका प्रतीक गौतम बुद्धको २५७०औँ जयन्ती देशभर हर्षोल्लासका साथ मनाइँदै

जनकपुरधाम, बैशाख १८ गते ।  शान्तिका अग्रदूत तथा भगवान् विष्णुको नवौँ अवतारका रूपमा पूजित सिद्धार्थ गौतम बुद्धको २५७०औँ जयन्ती आज वैशाख शुक्ल पूर्णिमाका दिन देशभर धार्मिक उत्साह र भक्तिभावका साथ मनाइँदै छ। लुम्बिनी, स्वयम्भू र बौद्धलगायत पवित्र स्थलहरूमा लामा तथा बौद्ध धर्मगुरुहरूको उपस्थितिमा पूजा, आराधना र प्रवचनका कार्यक्रम आयोजना गरिएका छन्। बुद्धको जन्म, ज्ञानप्राप्ति र महापरिनिर्वाण — यी तीनै महत्त्वपूर्ण घटना वैशाख शुक्ल पूर्णिमाकै तिथिमा परेकाले यस दिनलाई बौद्ध धर्मावलम्बीले विशेष श्रद्धा र महत्त्वका साथ मनाउने गर्दछन्।

इसापूर्व ५६३ मा रुपन्देही जिल्लाको लुम्बिनी उद्यानमा राजा शुद्धोधन र माता मायादेवीका पुत्रका रूपमा जन्मिएका सिद्धार्थ गौतम राजकीय सुखसुविधाको बीचमा पनि मानवीय दुःखले विचलित भए र २९ वर्षकै उमेरमा दरबार त्यागेर तपस्याको मार्गमा लागे। "अहिंसा नै शान्ति र मैत्रीको आधारशिला हो" जस्ता कालजयी सन्देश दिएका गौतम बुद्धले विश्व शान्ति स्थापनामा पुर्याएको अतुलनीय योगदानको स्मरणस्वरूप प्रत्येक वर्ष वैशाख शुक्ल पूर्णिमाका दिन बुद्ध जयन्ती मनाउने परम्परा रहँदै आएको छ।