सीमा विवादले सर्लाहीमा तनाव, छलफलपछि अवस्था सामान्य

जनकपुरधाम, बैशाख ८ गते । नेपाल–भारत सीमामा पर्ने भारतको सोनबरसा थाना क्षेत्र नजिक इन्दरवा गाउँ आसपास शुक्रबार दिउँसो भएको घटनाले केहीबेर सीमा क्षेत्रमा तनाव सिर्जना गरेको छ । नेपालतर्फ खेततर्फ जाँदै गरेका एक भारतीय नागरिकको मोटरसाइकल सशस्त्र प्रहरीले नियन्त्रणमा लिएपछि विवाद सुरु भएको हो । त्यसपछि आक्रोशित भारतीय पक्षले प्रतिक्रिया स्वरूप केही नेपाली नागरिकका मोटरसाइकल नियन्त्रणमा लिन थालेपछि अवस्था जटिल बनेको थियो । दुवै देशका सुरक्षाकर्मीबीच तत्काल छलफल भएपछि नियन्त्रणमा लिएको मोटरसाइकल फिर्ता गरिएसँगै स्थिति सामान्य बनेको स्थानीयले बताएका छन् ।

पछिल्ला दिनमा नेपालतर्फ भारतीय नम्बर प्लेटका सवारी साधनमा कडाइ गरिएपछि सीमावर्ती क्षेत्रमा असन्तोष बढ्दै गएको छ । प्रचलित नियमअनुसार विदेशी नम्बर प्लेटका सवारी नेपाल प्रवेश गर्दा भन्सार पास अनिवार्य हुने व्यवस्था रहे पनि यसको कडाइले दैनिक आवतजावत गर्ने स्थानीय प्रभावित भएका छन् । यसबीच भारतीय पक्षबाट नेपाली सवारी रोक्ने र दबाब दिने घटनासमेत देखिएका छन् । साथै, सीमा क्षेत्रमा नागरिकता र जग्गा स्वामित्वसम्बन्धी विवादसमेत सतहमा आएको छ । यस्ता गतिविधिले दीर्घकालीन रूपमा सुरक्षा र प्रशासनिक चुनौती निम्त्याउन सक्ने भन्दै सरोकारवालाले गहिरो छानबिनको माग गरेका छन् । Meanwhile, मधेस प्रदेशका प्रहरी प्रमुख डीआईजी गोविन्द थपलियाले सीमा क्षेत्रमा सर्वसाधारणलाई अनावश्यक दुःख नदिन र नागरिकमैत्री व्यवहार अपनाउन मातहतका निकायलाई निर्देशन दिएका छन् ।