ट्रम्पको इरानलाई ४८ घण्टाको अल्टिमेटम : होर्मुज स्ट्रेट नखोले ऊर्जा केन्द्र नष्ट गर्ने चेतावनी

एजेन्सी, चैत ८ गते । अमेरिकी राष्ट्रपति डोनाल्ड ट्रम्पले इरानलाई होर्मुज स्ट्रेट खोल्न ४८ घण्टाको समयसीमा दिएका छन्। ट्रम्पले आफ्नो ‘ट्रुथ सोसल’ प्लेटफर्ममा पोस्ट गर्दै यदि यो समयावधिभित्र स्ट्रेट पूर्ण रूपमा र विना धम्की खोलिएन भने अमेरिकाले इरानी ऊर्जा केन्द्रहरू (पावर प्लान्टहरू) नष्ट गर्ने चेतावनी दिएका छन्। उनको पोस्ट २१ मार्चको २३:४४ जीएमटीमा गरिएको हो, जसको अर्थ इरानसँग २३ मार्चको २३:४४ जीएमटी (तेहरान समयअनुसार २४ मार्च बिहान ०३:१४) सम्मको समय छ।

होर्मुज स्ट्रेट विश्वको करिब २० प्रतिशत तेल र तरल प्राकृतिक ग्यास (एलएनजी) ढुवानी हुने महत्वपूर्ण जलमार्ग हो। इरानले लगाएको नाकाबन्दी र जहाजमाथि आक्रमणका कारण पछिल्ला हप्ताहरूमा तेलको मूल्य ह्वात्तै बढेको छ। इरानी सरकारी सञ्चारमाध्यमका अनुसार यदि आफूमाथि आक्रमण भएमा खाडी क्षेत्रभरि अमेरिकासँग जोडिएका ऊर्जा केन्द्रहरूलाई निशाना बनाउने तेहरानले बताएको छ। ट्रम्पको यो चेतावनीले मध्यपूर्वमा तनाव थप बढाएको छ र अन्तर्राष्ट्रिय बजारमा तेल आपूर्तिको जोखिम बढाएको छ।