मजदुरको हित एमालेको प्राथमिकता : दमकमा अध्यक्ष ओलीको दाबी

काठमाडौं, फाल्गुन ७ गते । केपी शर्मा ओलीले झापाको दमकमा आयोजित सिटी रिक्सा चालकहरूको भेलालाई सम्बोधन गर्दै नेकपा एमाले सधैँ गरिब, विपन्न तथा मजदुर वर्गको पक्षमा उभिएको दाबी गर्नुभएको छ। उहाँले देशमा भोकमरीको अवस्था लगभग अन्त्य भइसकेको उल्लेख गर्दै अबको मुख्य लक्ष्य पूर्ण रूपमा गरिबी निवारण रहेको बताउनुभयो। एमालेको प्राथमिकतामा सुकुम्वासी, साना व्यवसायी तथा श्रमिक समुदाय रहेको उहाँको भनाइ थियो।

अध्यक्ष ओलीले आफ्नो नेतृत्वमा सुरु गरिएका स्वास्थ्य बीमा लगायत सामाजिक सुरक्षा कार्यक्रमहरूले नागरिकलाई राहत दिएको उल्लेख गर्दै जनताको करबाट नै सेवा विस्तार सम्भव भएको स्पष्ट पार्नुभयो। दमक क्षेत्रमा पाँच हजारभन्दा बढी सिटी रिक्सा सञ्चालनमा रहेको जानकारी दिँदै स्थानीय पूर्वाधार विकासमा एमाले नेतृत्व सफल भएको दाबी समेत गर्नुभयो। कार्यक्रमको अन्त्यमा उहाँले आगामी निर्वाचनमा एमालेको चुनाव चिह्न ‘सूर्य’मा मतदान गरी पार्टीलाई विजयी बनाउन मतदातासमक्ष अपिल गर्नुभयो।