बंगलादेशमा हिन्दु समुदायमाथि हिंसा जारी : एक हप्तामा १२ जनाको ज्यान गयो, सरकारले सांप्रदायिक नभएको दाबी

एजेन्सी, पुष २९ गते ।  बंगलादेशमा जारी राजनीतिक तथा सामाजिक अस्थिरताको बीच अल्पसंख्यक हिन्दु समुदायमाथि हिंसाको घटना रोकिएको छैन। ताजा घटनामा २८ वर्षीय हिन्दु युवक समीर कुमार दासलाई भीडले कुटपिट गरी हत्या गरेको छ। यो घटना गत जनवरी ११ गते राति भएको हो। यससँगै देशमा हालसम्म मारिएका हिन्दुहरूको संख्या १२ पुगेको छ। भारतविरोधी विद्यार्थी नेता शरिफ उस्मान हादीको मृत्युपछि हिंसक प्रदर्शन सुरु भएसँगै स्थिति झन् बिग्रिएको छ।

समीर कुमार दास फेनी जिल्लाको डागनभुइयाँ क्षेत्रमा अटोरिक्सा चालक थिए। प्रहरीका अनुसार हमलावरहरूले उनमाथि क्रूरतापूर्वक आक्रमण गरेपछि उनको अटोरिक्सा लिएर भागे। केही समयपछि उनको शव उपजिल्ला अस्पताल नजिकै फेला परेको थियो। प्रारम्भिक अनुसन्धानमा यो लुटपाट तथा हत्याको घटना देखिएको प्रहरीले जनाएको छ। हालसम्म कसैलाई पनि पक्राउ गरिएको छैन।

समीरको हत्याभन्दा केही दिनअघि नरसिंदी जिल्लामा एक हिन्दु किराना पसल सञ्चालकमाथि आक्रमण भएको थियो। गम्भीर घाइते भएका उनलाई अस्पताल लगिएकोमा चिकित्सकले मृत घोषणा गरेका थिए। विगत एक हप्तामा हिंसासँग सम्बन्धित दुई हिन्दु पुरुषको मृत्यु भएको छ। सिलहटमा जॉय मोहापात्राको अस्पतालमा मृत्यु भयो। आरोप छ कि मोबाइल फोनको किस्ता विवादमा दुकानदार आमिरुल इस्लामले उनलाई कुटपिट गरी अपमानित गरेपछि जॉयले विष सेवन गरेका थिए। उत्तर–पश्चिमी कुरिग्राम जिल्लामा २५ वर्षीय मिथुन सरकार चोरीको आरोपमा भीडबाट बच्न नहरमा हाम फालेपछि मृत्यु भएको थियो।

बंगलादेश हिन्दु बौद्ध ईसाई यूनिटी काउन्सिलले विगत दुई हप्तामा अल्पसंख्यक समुदायलाई लक्षित गरी धेरै घटना भएको दाबी गरेको छ। परिषदका अनुसार असामाजिक तत्वहरूले एक हिन्दु विधवामाथि बलात्कार गरे, एक हिन्दु ज्वेलरी पसलमा लुटपाट गरे र उत्तर–पश्चिमी कुरिग्राम जिल्लाकी हिन्दु डिप्टी कमिश्नरलाई चुनाव रिटर्निङ अफिसरको रूपमा कर्तव्य निर्वाह गर्दा धम्की दिए। विगत सात दिनमा पनि यस्तै घटनाहरू भएको दाबी छ।

मोहम्मद यूनुस नेतृत्वको बंगलादेश सरकारले यी हत्याहरूको निन्दा गरेको छ तर बारम्बार यिनलाई 'सांप्रदायिक नभएको' बताउँदै मृत्युको संख्या 'अपवाद' भनेको छ। फेब्रुअरी १२ मा हुने आम निर्वाचनमा शेख हसीना सरकार हटेपछि पहिलो चुनाव हुन लागेकोले अल्पसंख्यकहरूको सुरक्षाप्रति चिन्ता झन् गहिरिएको छ।

बंगलादेशमा हिन्दु समुदायमाथि हिंसाको यो शृङ्खलाले अन्तर्राष्ट्रिय ध्यानाकर्षण गरेको छ। सरकारले तत्काल प्रभावकारी कदम नचालेमा स्थिति झन् बिग्रन सक्ने देखिएको छ।