वीरगञ्जको बिपी उद्यानबाट अव्यवस्थित पसल हटाइयो, ७० करोडमा हरियाली पार्क बनाउने योजना

जनकपुरधाम, मंसिर २८ गते ।वीरगञ्ज महानगरपालिकाले घण्टाघर चोकसँग जोडिएको बिपी उद्यानमा अतिक्रमण गरेर सञ्चालित अस्थायी पसलहरू हटाएको छ । मुख्य सहरको मुटुमा रहेको यो उद्यानलाई थप व्यवस्थित र हरियाली पार्क बनाउने उद्देश्यले महानगरले यो कदम चालेको हो । महानगर प्रमुख राजेशमान सिंहले अव्यवस्थित बजारका कारण उद्यानको सौन्दर्य बिग्रिएको भन्दै पसल हटाएर सुन्दर पार्क निर्माण गर्ने योजना अघि बढाइएको बताए ।

“अव्यवस्थित बजारलाई आज बिहान एक्स्काभेटर लगाएर हटाउने काम गरेका छौं । यहाँ व्यापार गर्दै आएकाहरूले सरसामान हटाइरहेका छन्,” प्रमुख सिंहले भने । उद्यानमा अस्थायी घरटहरा, तरकारी-फलफूल पसल, कपडा पसल र विभिन्न खानाका स्टल गरी करिब २५० भन्दा बढी व्यापारीहरू थिए । महानगरले अब करिब ७० करोड रुपैयाँ खर्चेर सुन्दर र हरियाली पार्क बनाउने योजना अघि बढाउने जनाएको छ । यहाँबाट हटाइएकाहरूलाई छपकैयाँस्थित रेल्वे सडकमा तयार गरिएको नयाँ संरचनामा स्थानान्तरण गरिने प्रमुख सिंहले जानकारी दिए ।

आज बिहानैदेखि नगर प्रहरी, नेपाल प्रहरी र सशस्त्र प्रहरीको बाक्लो उपस्थितिमा बजार खाली गराइएको थियो । यो अभियानले वीरगञ्जको मुख्य चोकलाई थप व्यवस्थित र आकर्षक बनाउने अपेक्षा गरिएको छ । थप अपडेटका लागि हाम्रो पोर्टलमा रहनुहोस् ।