बिहेको प्रलोभन देखाई नाबालिकासँग शारीरिक सम्बन्ध राख्ने युवकविरुद्ध प्रहरीमा उजुरी

जनकपुरधाम, मंसिर १४ गते ।  हनुमाननगर कंकालिनी नगरपालिका–१४ का २२ वर्षीय परमेश्वर कुमार मुखियाविरुद्ध एक नाबालिकासँग बिहेको प्रलोभन देखाई शारीरिक सम्बन्ध राखेको आरोपमा प्रहरीमा उजुरी परेको छ । झापाको बिर्तामोडमा सडक मर्मत कार्यको रेखदेख गर्दै आएका मुखियाले नाबालिकालाई प्रेममा फसाएर मंसिर ६ गते बिहे गर्ने भन्दै बिर्तामोड बोलाएका थिए । दुई दिनसम्म त्यहाँ राखेर शारीरिक सम्बन्ध स्थापित गरेको र पछि जन्मदर्ता प्रमाणपत्र ल्याउनुपर्छ भन्दै भारदहसम्म ल्याएर छोडिदिएको पीडित नाबालिकाले बताएकी छन् । दुई दिनपछि घर फर्किएकी नाबालिकासँग बुबाआमाले सोधपुछ गरेपछि घटना बाहिर आएको हो ।

पीडितका बुबाआमाले परमेश्वरका अभिभावकसँग बिहेबारे कुरा गर्दा अस्वीकार गरेपछि छोरी बिचल्लीमा परेको बताएका छन् । परमेश्वरले मोबाइल स्विच अफ राखेको र अभिभावकहरूले पनि बिहे गर्न नमानेपछि जिल्ला प्रहरी कार्यालय सप्तरीमा उजुरी दर्ता गराइएको छ । घटनाबारे जाहेरी आएको र आवश्यक कारबाहीका लागि इलाका प्रहरी कार्यालय हनुमाननगर पठाइएको प्रहरी नायब उपरीक्षक डम्बरबहादुर पुरीले जानकारी दिए । यो घटनाले नाबालिकाहरूको सुरक्षाप्रति थप सतर्कता अपनाउन आवश्यकता औंल्याएको छ ।