राप्रपाको निर्णय : मंसिर २३ गते काठमाडौंमा विशाल प्रदर्शन, राजा-दल-जेनजीबीच समझदारीका लागि दबाव

काठमाडौँ,मंसिर १२ गते । राष्ट्रिय प्रजातन्त्र पार्टी (राप्रपा) ले मंसिर २३ गते काठमाडौं उपत्यकामा विशाल प्रदर्शन गर्ने निर्णय गरेको छ । बिहीबार बसेको केन्द्रीय कार्यसम्पादन समितिको बैठकले राजा, राजनीतिक दल र जेनजीबीच नवीन समझदारीका लागि दबाव दिने उद्देश्यले यो प्रदर्शन आयोजना गर्ने निर्णय गरेको प्रवक्ता मोहन श्रेष्ठले जानकारी दिए । साथै, मुलुकको समसामयिक परिस्थितिमा पार्टीको धारणा अवगत गराउन प्रधानमन्त्री सुशीला कार्कीसँग भेट गर्ने र देशव्यापी सभा तथा प्रदर्शन आयोजना गर्ने निर्णय पनि भएको छ । सभा र प्रदर्शन व्यवस्थापनका लागि प्रवक्ता ज्ञानेन्द्र शाहीको संयोजकत्वमा गोपाल दाहाल, रवीन्द्रप्रताप शाह र धनबहादुर बुढा रहेको समिति गठन गरिएको छ ।

राप्रपाले समान विचारधारा भएका दल, अभियान, समूह र व्यक्तिहरूसँग एकता, मोर्चा र सहकार्यका लागि वार्ता समिति पनि गठन गरेको छ । यो समितिमा वरिष्ठ उपाध्यक्षहरू बुद्धिमान तामाङ, विक्रम पाण्डे र ध्रुबबहादुर प्रधान रहेका छन् । यो निर्णयले राप्रपाको राजनीतिक सक्रियता बढाउने र राष्ट्रिय मुद्दाहरूमा दबाव सृजना गर्ने अपेक्षा गरिएको छ ।