काठमाडौंमा सडक खाल्डाखुल्डी तत्काल मर्मत गर्न ‘सडक एम्बुलेन्स’ सञ्चालन, मोबाइल एप्स पनि सुरु

काठमाडौँ,मंसिर १२ गते । उपत्यकाका सडकहरूमा रहेका खाल्डाखुल्डी तत्काल मर्मत गर्न नेपालमै पहिलोपटक ‘सडक एम्बुलेन्स’ सञ्चालनमा ल्याइएको छ । ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङले बिहीबार सडक डिभिजन कार्यालय काठमाडौंले प्रयोगमा ल्याएको यो एम्बुलेन्सको शुभारम्भ गरे । सडक डिभिजन कार्यालय काठमाडौंको कार्यक्षेत्रमा पर्ने काठमाडौं जिल्लाभित्रका सामरिक महत्वका सडकहरूमा यो एम्बुलेन्स प्रयोग गरिने छ । यससँगै सडकका खाल्डाखुल्डीको तत्काल जानकारी दिन र मर्मत कार्य अघि बढाउन मोबाइल एप्स पनि सञ्चालनमा ल्याइएको छ, जसमा खाल्डोको फोटो अपलोड गरेर मर्मतको अद्यावधिक विवरण राख्न सकिन्छ ।

कार्यक्रममा मन्त्री घिसिङले सडक एम्बुलेन्सलाई नेपालमा नमुनाका रूपमा सञ्चालन गरिएको बताउँदै यसलाई अन्य मुख्य शहरहरूमा विस्तार गरी सडक मर्मतसम्बन्धी गुनासो सम्बोधन गर्ने प्रतिबद्धता जनाए । विकसित देशहरूमा जस्तै अत्याधुनिक उपकरण जडान गरी सेवा प्रभावकारी बनाउनुपर्नेमा उनले जोड दिए । एम्बुलेन्समा तालिमप्राप्त प्राविधिक टोली रहने छ, जसले खाल्डो देखिएको स्थानमा छिट्टै पुगेर मर्मत गर्नेछ । भिडभाडको समयमा आकस्मिक मर्मत गर्न सकिने यो प्रणालीमा ट्राफिक व्यवस्थापनका लागि चेतावनी बत्तीहरू पनि जडान गरिएका छन् ।