धनुषाको कमला नगरपालिकाका पूर्व मेयरसहित १० जनाविरुद्ध अख्तियारले दायर गर्‍यो भ्रष्टाचार मुद्दा

जनकपुरधाम,मंसिर १२ गते ।अख्तियार दुरुपयोग अनुसन्धान आयोगले कमला नगरपालिकाका तत्कालीन मेयर राम उदगार गोइतसहित १० जनाविरुद्ध भ्रष्टाचार मुद्दा दायर गरेको छ । लग्मा बजारस्थित पोखरीको डिलमा माटो पुर्ने तथा घाट निर्माण कार्यमा न्यूनतम कबोल गर्ने फर्मसँग सम्झौता नगरी दोस्रो प्रस्ताव दातासँग मिलेमतो गरेको आरोपमा आयोगले बिहीबार विशेष अदालतमा मुद्दा दायर गरेको हो । आयोगले इन्फ्रास्ट्रक्चर एस एन्ड बी बिल्डर्स प्रालि र यसका अध्यक्ष सन्तोषकुमार यादवविरुद्ध पनि मुद्दा दायर गरेको छ । उनीहरूले आपसी मिलेमतोमा २९ लाख ४४ हजार १ सय ३७ रुपैयाँ अनियमितता गरेको आयोगको ठहर छ ।

आयोगका प्रवक्ता राजेन्द्र कुमार पौडेलका अनुसार, मुद्दा दायर हुनेहरूमा तत्कालीन निमित्त प्रमुख प्रशासकीय अधिकृत वीरेन्द्रकुमार साह, लेखापाल सञ्जीवकुमार महतो, जिन्सी शाखा प्रमुख जुगलकिशोर यादव तथा कार्यपालिका सदस्यहरू धनेश्वर यादव, धर्मनाथ मण्डल, पल्टु कवारी र समसुल मिया मोमिन समावेश छन् । यो मुद्दाले स्थानीय तहमा हुने अनियमितता र भ्रष्टाचारलाई नियन्त्रण गर्ने प्रयासलाई बल पुर्‍याउने अपेक्षा गरिएको छ ।