मुख्यमन्त्री सरोज यादवको नियुक्ति विवाद : रिटमाथिको सुनुवाइ फेरि स्थगित, भोलि पेसी

जनकपुरधाम, मंसिर ११ गते ।  मधेस प्रदेशका मुख्यमन्त्री सरोजकुमार यादवको नियुक्ति तथा शपथविरुद्ध दायर रिटमाथिको सुनुवाइ बिहीबार नसकिएपछि ‘हेर्दाहेर्दैमा’ राखेर शुक्रबारका लागि सारिएको छ। न्यायाधीशद्वय हरिप्रसाद फुयाँल र नित्यानन्द पाण्डेको संयुक्त इजलासमा सुनुवाइ सुरु भएकै दिन नसकिएपछि नयाँ मिति तोकिएको हो। सुरुमा न्यायाधीश फुयाँलले तीन घण्टाभित्र बहस सक्नुपर्ने निर्देशन दिएका थिए, तर कानुन व्यवसायीहरूले समय अभावको कारण देखाएपछि थप समय प्रदान गरिएको थियो। रिट निवेदक पक्षले दुई घण्टाभन्दा बढी बहस गरेपछि मुख्यमन्त्री पक्षका वरिष्ठ अधिवक्ता सुरेन्द्र महतोले एक घण्टा बहस गरेका थिए, तर समय नपुग्दा सुनुवाइ भोलि निरन्तरता पाउने भएको हो।

मधेस प्रदेश कांग्रेस संसदीय दलका नेता कृष्णप्रसाद यादवसहित ७४ सांसदले मुख्यमन्त्री सरोज यादवको नियुक्तिविरुद्ध सर्वोच्च अदालतमा रिट दर्ता गरेका थिए। यसअघि रक्की यादवसहितको अर्को रिटमा सर्वोच्च अदालतले मुख्यमन्त्री यादवलाई मधेस प्रदेशमा दीर्घकालीन प्रभाव पार्ने कुनै पनि नीतिगत निर्णय नगर्न अन्तरिम आदेश जारी गरिसकेको छ। न्यायाधीश टेकप्रसाद ढुंगानाको इजलासले सर्वोच्च अदालत नियमावली २०७४ को नियम ४९(२)(क) बमोजिम उक्त आदेश जारी गरेका हो। अदालतले अन्तिम फैसला नआएसम्म मुख्यमन्त्री यादवलाई दीर्घकालीन प्रकृतिका निर्णयबाट टाढा रहन भनिएको छ।