धनगढीमा एमाले नेता महेश बस्नेतविरुद्ध जेनजी युवाहरूको प्रदर्शन, सुरक्षाकर्मी तैनाथ

काठमाडौं, मंसिर १० गते ।  नेकपा (एमाले)का नेता महेश बस्नेतविरुद्ध कैलालीको धनगढीमा पनि जेनजी युवाहरू प्रदर्शनमा उत्रिएका छन् । राष्ट्रिय युवा संघले बुधबार आयोजना गरेको युवा जागरण अभियानलाई सम्बोधन गर्न बस्नेत धनगढी आउने भएपछि युवाहरू प्लाकार्डसहित विरोधमा उत्रिएका हुन् । धनगढीको जेनजी मार्ग नजिक हसनपुरमा युवाहरूको समूहले प्लेकार्ड प्रदर्शन गर्दै बस्नेतको विरोध गरिरहेका छन् । जेनजी आन्दोलनपछि युवाहरूले बस्नेतविरुद्ध निरन्तर प्रदर्शन गर्दै आएका छन् ।

यसअघि गत ४ मंसिरमा बाराको परवानीपुरमा आयोजित कार्यक्रममा बस्नेत सहभागी हुन लागेको थाहा पाएपछि जेनजी युवाहरूले प्रदर्शन गरेका थिए, जसले गर्दा दुई दिनसम्म बाराको सिमरा क्षेत्र अशान्त बनेको थियो । त्यसैगरी, ७ मंसिरमा विराटनगरमा बस्नेत चढेको गाडीमा दुई जेनजी युवाले रातो रङ भरिएको बेलुन प्रहार गरेका थिए । मंगलबार सुर्खेतमा पनि केही युवाले बस्नेत सहभागी कार्यक्रमलाई लक्षित गर्दै विरोध प्रदर्शन गरेका थिए । जेनजी समूहले ठाउँठाउँमा अवरोध गर्न खोजेपछि कार्यक्रम स्थलमा बाक्लो संख्यामा सुरक्षाकर्मी परिचालन गरिएको छ ।