रौतहटमा युवतीको शंकास्पद मृत्यु : सलको पासो लगाई झुण्डिएको अवस्थामा भेटिइन्

जनकपुरधाम, मंसिर १० गते ।  रौतहटको माधवनारायण नगरपालिका–४, बिशुनपुर्वा टोलकी २० वर्षीया रुबिना यादव मंगलबार साँझ सलको पासो लगाई झुण्डिएको अवस्थामा मृत फेला परेकी छन् । रुपेश राय यादवकी श्रीमती रुबिनाको मृत्यु शंकास्पद रहेको भन्दै प्रहरीले अनुसन्धान सुरु गरेको छ ।

जिल्ला प्रहरी कार्यालय रौतहटका प्रवक्ता तथा प्रहरी नायब उपरीक्षक विष्णु प्रदीप बस्यालका अनुसार, घरका सदस्यहरू खेतमा काम गर्न गएको बेला साँझ करिब ५ः३० बजे रुबिना झुण्डिएको अवस्थामा फेला परेकी थिइन् । उनलाई सबैभन्दा पहिले श्रीमान् रुपेशले देखेका थिए । स्थानीय बासिन्दाको सहयोगमा पासो खोल्दा उनको मृत्यु भइसकेको थियो । प्रहरी पुग्नुभन्दा अगावै शवलाई घरको प्यासेजमा राखिएको थियो । इलाका प्रहरी कार्यालय गरुडाको टोलीले घटनाको विस्तृत अनुसन्धान गरिरहेको प्रवक्ता बस्यालले बताए । मृतकको शव परीक्षणका लागि प्रादेशिक अस्पताल गौर पठाइएको छ । प्रहरीले आत्महत्या वा अन्य कुनै कारण रहे-नरहेको विषयमा अनुसन्धान भइरहेको जनाएको छ ।