अयोध्यामा ध्वजारोहणको पूर्वसन्ध्यामा सीतामढीमा भव्य जानकी मन्दिर निर्माण सुरु हुने

एजेन्सी, मंसिर ८ गते । अयोध्यामा प्रधानमन्त्री नरेन्द्र मोदीद्वारा २५ नोभेम्बरमा रामलला मन्दिरको शिखरमा ध्वजारोहण हुने अघिल्लो दिन सोमबार (२४ नोभेम्बर) सीतामढीको पुनौराधामस्थित माता सीताको प्राकट्यस्थलमा भव्य ‘मां जानकी’ मन्दिर निर्माण कार्य सुरू हुने भएको छ। पर्यटन मन्त्री अरुण शंकर प्रसादले आइतबार जानकी मन्दिरमा पूजा–दर्शनपछि सोमबारदेखि नै निर्माण कार्य प्रारम्भ गरिने घोषणा गरेका हुन्। गत ८ अगस्ट २०२५ मा केन्द्रीय गृहमन्त्री अमित शाह र मुख्यमन्त्री नीतीश कुमारले संयुक्त रूपमा शिलान्यास गरेको यो परियोजनाका लागि ६७ एकड जग्गा अधिग्रहण भइसकेको छ भने बिहार सरकारले ८८२ करोड रुपैयाँ बजेट छुट्याइसकेको छ।

अयोध्यास्थित रामलला मन्दिर जस्तै भव्य र आकर्षक संरचनामा बन्ने जनककी बेटी सीताको यो ऐतिहासिक मन्दिरसँगै परिक्रमा मार्ग, सीता वाटिका, लव–कुश वाटिका, महोत्सव स्थल, पार्किङ, थ्रीडी एनिमेशन शो, डिस्प्ले कियोस्कलगायत पर्यटकीय संरचना निर्माण गरिनेछ। परियोजना पूरा भएपछि सीतामढी पुनौराधाम एक प्रमुख धार्मिक–पर्यटकीय गन्तव्यको रूपमा विकसित हुने र देश–विदेशबाट ठूलो संख्यामा भक्तजन तथा पर्यटक आउने अपेक्षा गरिएको छ। पर्यटन मन्त्री प्रसादले मन्दिर निर्माणलाई विभागको ‘ड्रीम प्रोजेक्ट’ बताउँदै निर्धारित समयमै काम सकिने र सीतामढीलाई द्रुतगतिमा आधुनिक धार्मिक सहरका रूपमा उभ्याइने आश्वासन दिएका छन्।