बिहार चुनावमा हारको जिम्मेवारी लिँदै प्रशान्त किशोर : नीतीशको १० हजार योजना नभएको भए जेडीयू २५ सिट पनि जित्दैनथ्यो

एजेन्सी, मंसिर ३ गते ।बिहार विधानसभा चुनावमा करारी हारपछि जन सुराज पार्टीका संस्थापक प्रशान्त किशोर मङ्गलबार पहिलो पटक मिडियासामु आएका छन्। उनले बिहार नछोड्ने र अब सल्लाह होइन संघर्ष गर्ने समय आएको बताएका छन्। आफ्नो पार्टीले जनतासँग विश्वास जित्न नसकेको र आफ्नै कमजोरीले मुद्दाहरू ठीक ढङ्गले जनतासामु नपुगेको स्वीकार गरेका छन्। मुख्यमन्त्री नीतीश कुमारको महिला रोजगार योजनाअन्तर्गत हरेक विधानसभा क्षेत्रमा ६० हजारभन्दा बढी लाभार्थीलाई १० हजार रुपैयाँ नदिएको भए जेडीयूले २५ सिट पनि जित्न नसक्ने दाबी गरेका छन्। एनडीए सरकारले चुनावअघि जनताको पैसाबाट ४० हजार करोडका घोषणा गरेको र पैसा बाँडेको आरोप लगाउँदै उनले बिहारलाई बुझ्न आफू असफल भएको बताएका छन्।

प्रशान्त किशोरले चुनाव नतिजा अपेक्षाकृत नआएको जिम्मेवारी आफैंले लिएका छन्। आफ्नो पार्टीले समाजलाई नबाँडेको र भोट नकिनेको दाबी गर्दै उनले अङ्ग्रेजी मुहावरा उद्धृत गर्दै भनेका छन्– “तपाईं तबसम्म हार्नुहुन्न जबसम्म खेल छोड्नुहुन्न।” जनतालाई देखाएको सपना पूरा नगरेको प्रायश्चितस्वरूप उनले २० नोभेम्बरमा भितिहरवा आश्रममा एकदिने मौन सामूहिक उपवास बस्ने घोषणा गरेका छन्। यसअघि नीतीशको पार्टीले २५ सिटभन्दा बढी जिते राजनीतिबाट सन्यास लिने घोषणा गरेका किशोरले अब यो आरोप लगाएर नयाँ राजनीतिक अभियान सुरु गरेका छन्।