दुर्गा प्रसाईंलाई भक्तपुरबाट पक्राउ, सार्वजनिक शान्ति भंग गरेको आरोप

काठमाडौं, मंसिर ३ गते । प्रहरीले सोमबार मध्यराति भक्तपुरस्थित निवासबाट मेडिकल व्यवसायी दुर्गा प्रसाईंलाई पक्राउ गरेको छ। सार्वजनिक शान्ति भंग गर्ने अभिव्यक्ति दिएको आरोपमा उनलाई नियन्त्रणमा लिइएको जिल्ला प्रहरी परिसर काठमाडौँका एसपी पवनकुमार भट्टराईले बताएका छन्। अभिव्यक्ति स्वतन्त्रताको आडमा प्रसाईंले समाजलाई भड्काउने, अफवाह फैलाउने र आन्दोलन भड्काउने खालका अभिव्यक्ति दिँदै आएका थिए। सामाजिक सञ्जालमा भाइरल भएका उनका भनाइले धेरैमा त्रास फैलाएको थियो भने राजनीतिक तथा निजी क्षेत्रका व्यक्तित्वहरूमाथि आधारहीन लाञ्छना लगाउने काम पनि गरेका थिए। विगतमा माओवादी, एमालेसँग निकट रहेका र पछि राजावादी प्रचारमा लागेका प्रसाईं यसअघि पनि तीन पटक पक्राउ परिसकेका छन्। अहिले उनलाई सार्वजनिक शान्ति खलल पार्ने कसुरमा अनुसन्धानका लागि जिल्ला प्रहरी परिसर काठमाडौँमा राखिएको छ।

यसअघि चैत १५ को तीनकुने आन्दोलनपछि प्रसाईंलाई भारतको आसामबाट पक्राउ गरी ल्याइएको थियो। सो घटनामा उनको उक्साहटले आन्दोलन हिंसात्मक बन्दा दुई जनाको मृत्यु र २० जना घाइते भएका थिए भने सरकारी गाडी, घर र कार्यालयहरूमा आगजनी भएको थियो। घटनापछि फरार प्रसाईंलाई खोज्न प्रहरीले विशेष टोली गठन गरेको थियो जसले इटहरीबाट गाडी बरामद गरी झापा, उत्तराखण्ड, लखनऊ, दिल्ली हुँदै आसाम पुगेर पक्राउ गरेको थियो। यसअघि मंसिर ४ मा तत्कालीन प्रधानमन्त्री केपी ओलीमाथि जघन्य आरोप लगाएर साइबर अपराधमा पक्राउ परेका थिए भने असोज ६ मा विभिन्न व्यक्तिमाथि आपत्तिजनक अभिव्यक्ति दिएको उजुरीमा घरबाटै नियन्त्रणमा लिइएको थियो। पटक–पटक पक्राउ पर्दै धरौटीमा छुट्दै आएका प्रसाईंलाई यसपटक पनि अनुसन्धानपछि कारबाही हुने प्रहरीले जनाएको छ।