नक्खु कारागारमा अमरेश सिंह–रवि लामिछाने भेट, नयाँ राजनीतिक विकल्पबारे छलफल

काठमाडौं, मंसिर ३ गते । विघटित प्रतिनिधिसभाका स्वतन्त्र सांसद अमरेश सिंहले राष्ट्रिय स्वतन्त्र पार्टी (रास्वपा)का सभापति रवि लामिछानेसँग मंगलबार नक्खु कारागारमा भेटवार्ता गरेका छन् । करिब एक घण्टा चलेको भेटमा दुवैले देशको राजनीतिक भविष्य, नयाँ सहकार्यको सम्भावना र जनताको आस्था पुनःस्थापना गर्ने उपायबारे विस्तृत छलफल गरेको सिंहले बताए । दशकौँदेखि एउटै नेतृत्त्वको घेरामा जनता अल्झिएको भन्दै सिंहले शेरबहादुर देउवा र केपी शर्मा ओलीको पुनः–पुनः दोहोरिने भूमिकालाई उदाहरणसमेत प्रस्तुत गरे ।

सिंहका अनुसार भेटवार्तामा आगामी राजनीतिक यात्राका लागि नयाँ शक्ति निर्माणको सम्भावनाबारे सकारात्मक सहमति बनेको छ । उनले बालेन साह, रवि लामिछाने, कुलमान घिसिङ र जेन–जी पुस्ताका युवा अभियन्ताहरू मिलेर वैकल्पिक राजनीतिक मोर्चा तयार गर्न आवश्यक रहेको धारणा राखे । सिंहले पुरानै नेताहरूको चक्रब्युँह तोडेर जनताले चाहेअनुसारको नयाँ राजनीतिक नेतृत्व निर्माण गर्न अहिले उपयुक्त समय रहेको टिप्पणी गरे ।