जेनजी आन्दोलनपछि ठप्प सवारी लाइसेन्स सेवा आजदेखि आंशिक रूपमा सुरु, उपत्यकाका चार कार्यालयबाट सेवा पुनः संचालन

काठमाडौं, कार्तिक १७ गते ।  जेनजी आन्दोलनपछि स्थगित भएको सवारी चालक अनुमतिपत्र (लाइसेन्स) सेवा आजदेखि आंशिक रूपमा सुरु गरिएको छ। नयाँ बानेश्वरस्थित मीनभवनको यातायात व्यवस्था विभागमा आन्दोलनका क्रममा आगजनी र तोडफोड भएपछि देशभरका ४२ वटा यातायात कार्यालयका सेवाहरू ठप्प बनेका थिए। आगजनीका कारण विभागको सर्भरमा समेत क्षति पुगेको थियो।

विभागले आज सूचना जारी गर्दै उपत्यकाका एकान्तकुना, राधेराधे, चाबहिल र सानो भर्‍याङस्थित कार्यालयहरूबाट आंशिक रूपमा सेवा पुनः सञ्चालन गरिएको जनाएको छ। हाललाई विद्युतीय सवारी चालक अनुमतिपत्र र सवारी दर्तासम्बन्धी सेवा मात्र सुरु भएको विभागले स्पष्ट पारेको छ। नयाँ आवेदन, नवीकरण र इम्बोस्ड नम्बर प्लेटसम्बन्धी सेवा भने हाल निर्णय नभएको विभागले जनाएको छ। विभागका अधिकारीहरूका अनुसार अन्य कार्यालयमा पनि क्रमशः सेवा विस्तार गर्ने तयारी भइरहेको छ।