सर्लाही चन्द्रनगरमा जेन–जी युवामाथि वडा अध्यक्षको समूहको आक्रमण: मोटरसाइकल विवादबाट चर्कियो तनाव

जनकपुरधाम, कार्तिक ७ गते ।  सर्लाहीको चन्द्रनगर गाउँपालिका–१ मा वडा अध्यक्ष रामेश्वर प्रसाद महतोको नेतृत्वमा जेन–जी युवा विवेकानन्द गुप्तामाथि सामूहिक कुटपिट भएको छ। स्थानीयका अनुसार, महतो, उनका आफन्त मुकेश, अजय, अनिल महतो र सहयोगी राम साह, विजय महतो तथा शंकर महतोको समूहले गुप्ताको घरमै पुगेर आक्रमण गरे। यो घटनाले गाउँमा तनाव सिर्जना गरेको थियो, तर प्रहरी पुगेपछि स्थिति नियन्त्रणमा आएको छ। जेन–जी युवाहरूले वडा अध्यक्षविरुद्ध कारबाहीको माग गर्दै ‘पक्राउ गर’ भन्दै प्रदर्शन गरेका छन्।

घटनाको जड वडा कार्यालयको मोटरसाइकल विवाद हो। कार्तिक २ गते वडा सचिव रमन लुइँटेलको मोटरसाइकल अध्यक्ष महतोले बिना अनुमति लगेपछि जेन–जी युवाहरूले सोसल मिडियामा ‘चोरी’ को पोस्ट गरे। यसको प्रतिशोधमा आइतबार राति १० बजे घटना भएको हो। घाइते गुप्ताले वडा अध्यक्षको अनियमितताविरुद्ध आफ्नो विरोधकै कारण कुटपिट भएको बताए। प्रहरी प्रवक्ता सरोज राईका अनुसार, अध्यक्षको समूहले युवाको घरमा कुटपिट गर्ने शैलीमा प्रवेश गरेको पुष्टि भएको छ। अध्यक्ष महतोले सम्पर्कमा आउन मानेनन्। सहयोगी पशुपति महतोले मोटरसाइकल फर्काइएको बताए पनि सचिव लुइँटेलले ‘चोरी नै हो’ भने। प्रहरीले अनुसन्धान जारी राखेको छ।