जनकपुरधाम देवपुरा रुपैठा वडा अध्यक्ष मो. मोती राईन कबाड़ीको निलम्बन माग गर्दै हिन्दु सम्राट नेपालको प्रेस विज्ञप्ति

जनकपुरधाम, असोज २२ गते ।  हिन्दु सम्राट नेपाल नामक सङ्गठनले जनकपुरधाम उपमहानगरपालिका वडा नम्बर २० देवपुरा रुपैठाका वडा अध्यक्ष मो. मोती राईन कबाड़ीमाथि निलम्बनको माग गर्दै प्रेस विज्ञप्ति जारी गरेको छ। विज्ञप्तिमा मिति २०८२/०६/१७ र २०८२/०६/१९ गते हिन्दू र मुस्लिम समुदायबीच भएको विवादमा वडा अध्यक्षले अवरोध सृजना गरेको, नगरपालिकाका कर्मचारीमाथि हातपात गरेको र पत्रकारहरूलाई सामाजिक सद्भाव बिगार्ने बयान दिएको आरोप लगाइएको छ। सङ्गठनले यो घटनालाई तेलिया पोखरी जग्गा अतिक्रमण र इस्लामिक संरचना निर्माणसँग जोडेर वडा अध्यक्षलाई कानुनी कारबाही र तत्काल निलम्बन गर्न गृह मन्त्रालय, जिल्ला प्रशासन कार्यालय धनुषा र उपमहानगरपालिकालाई आग्रह गरेको छ।

विज्ञप्तिमा देवपुरा रुपैठामा हिन्दू पर्वहरूमा पटक-पटक द्वन्द्व सृजना गर्ने मुख्य पात्र वडा अध्यक्ष नै भएको स्थानीय आरोप उल्लेख गर्दै उनलाई निलम्बन नगरे फेरि उपद्रव र दङ्गा भड्काउने सम्भावना रहेको चेतावनी दिइएको छ। सङ्गठनका अनुसार, सर्वदलीय र सर्वपक्षीय बैठकका निर्णयहरू कार्यान्वयनमा अवरोध पुर्‍याएको भन्दै सबै पक्षले कानुनी सहयोग गर्नुपर्ने माग गरिएको छ। यो विज्ञप्ति हिन्दु सम्राट नेपालको केन्द्रीय कार्यालयबाट जारी भएको हो।