सुनको मूल्य फेरि रेकर्ड उच्चतामा, तोलाको २ लाख १० हजार नाघ्यो

काठमाडौं, भदौ २० गते । नेपालमा सुनको मूल्य निरन्तर उकालो लागिरहेको छ। शुक्रबार सुन तोलामा २ हजार ५ सय रुपैयाँले बढ्दै २ लाख १० हजार ४ सय रुपैयाँमा कारोबार भएको नेपाल सुनचाँदी व्यवसायी महासंघले जनाएको छ। यो अहिलेसम्मकै उच्च मूल्य हो। अघिल्लो दिन तोलाको २ लाख ७ हजार ९ सय रुपैयाँमा कारोबार भएको सुन आज नयाँ रेकर्ड कायम गरेको हो।

यससँगै चाँदीको मूल्य पनि सामान्य रूपमा बढेको छ। अघिल्लो दिन प्रतितोला २ हजार ४८० रुपैयाँमा कारोबार भएको चाँदी आज १० रुपैयाँ बढेर २ हजार ४९० रुपैयाँ पुगेको महासंघले जनाएको छ। लगातार बढ्दो सुनचाँदीको मूल्यले बजारमा थप चहलपहल भए पनि सामान्य उपभोक्तामाथि प्रत्यक्ष असर पर्न थालेको व्यापारीहरूले बताएका छन्।