सप्तरी राजविराज–११ मा १५ वर्षीया दलित बालिकामाथि सामूहिक बलात्कार, पीडित परिवारमाथि धम्की

जनकपुरधाम, श्रावण १८ गते । सप्तरीको राजविराज नगरपालिका–११ मा बुधबार साँझ सामूहिक बलात्कारमा परेकी १५ वर्षीया दलित बालिकाको परिवारले आरोपित पक्षको धम्कीका कारण जाहेरी दिन हच्किएको छ। घटना खुल्नासाथ मिलापत्रका लागि 'पञ्चायती' बसेको र पीडित परिवारले जाहेरी दिने अडान नछाडेपछि प्रलोभन र धम्की सुरु भएको हो, जसले उनीहरू बोल्नसमेत तर्काएका छन्।

दलित समुदायकी ती बालिकालाई बुधबार राति ८ बजे घरअगाडि उभिएका बेला चार जनाले उठाएर लगी बलात्कार गरेको परिवारको भनाइ छ। छिमेकीले देखेपछि खोजी गर्दा भोलिपल्ट गाउँनजिकै एक घरमा लुकाएर राखिएको अवस्थामा भेटिएको थियो। आरोपितमध्ये १९ वर्षीय किशोरलाई परिवारजनले समातेर हातपात गरेपछि प्रहरीको जिम्मा लगाइएको थियो। तर, दुई दिनसम्म जाहेरी नपरेपछि प्रहरीले किशोरलाई परिवारको जिम्मा फर्काएको छ।

जिल्ला प्रहरीले बिहीबार पीडित बालिकालाई बोलाई महिला, बालबालिका तथा ज्येष्ठ नागरिक सेवा कक्षमा प्रारम्भिक बयान लिएर घर पठाएको छ। बालिकाले १८ र १९ वर्षका किशोरले बलात्कार गरेको र अरू दुई जनाले सघाएको बताएकी छन्। घटनापछि पीडक पक्षले जाहेरी नदिन दबाब दिँदै आएको छ।

मिलापत्रका लागि शुक्रबार बिहान साढे ८ बजे स्थानीय स्वास्थ्य चौकीमा वडाध्यक्ष उदितनारायण यादवको उपस्थितिमा 'पञ्चायती' बसेको थियो, जसमा पीडित परिवार पनि सहभागी थियो। वडाध्यक्ष यादवले आफूले पञ्चायतीमा नगएको र गल्ती गर्नेलाई कानुनअनुसार कारबाही हुनुपर्ने मात्र बोलेको दाबी गरे। तर, पञ्चायती एक घण्टामै बिथोलिएपछि आरोपित परिवारले घरमै आएर जाहेरी नदिन आग्रह गर्दै विस्थापित गरिदिने धम्की दिएको स्थानीयले बताएका छन्।

पीडितका हजुरबुवाले जिल्ला समन्वय समिति परिसरमा चिन्ता व्यक्त गर्दै भने, 'जातीय आधारमा उनीहरूकै बाहुल्य छ, दुस्मनी गरिहाल्यो भने बस्न दिँदैनन्। मिलापत्रका लागि पैसा लिन मानेका छैनौं, तर मुद्दा गर्दा इज्जत जाने र गाउँमा कोही नरहने चिन्ता छ।' जिल्ला प्रहरीका सूचना अधिकारी डीएसपी जितेन्द्रकुमार बस्नेतले जाहेरी नआउँदा मुद्दा प्रक्रिया अघि बढ्न नसकेको र आरोपितलाई परिवारको जिम्मा दिइएको बताए।