सर्लाहीमा नक्कली नोटसहित दुई जना पक्राउ, थप अनुसन्धान जारी

जनकपुरधाम, जेठ ६ गते । सर्लाहीको पर्सा गाउँपालिका–६ स्थित हुलाकी सडकखण्डबाट प्रहरीले नक्कली नोटसहित दुई जनालाई पक्राउ गरेको छ। बुधबार साँझ भारतीय नम्बर प्लेट भएको मोटरसाइकल जाँच गर्ने क्रममा प्रहरीले ५०० रुपैयाँ दरका ४८ थान नक्कली नोट फेला पारेको हो, जसको कुल रकम २४,००० रुपैयाँ बराबरको छ।

पक्राउ पर्नेमा लालबन्दी नगरपालिका–६ का २१ वर्षीय मुकेश कुमार साह र हरिपुर्वा नगरपालिका–४ डुमरिया निवासी २३ वर्षीय सरोज पण्डित रहेका छन्। विशेष सूचनाका आधारमा प्रहरी नायब निरीक्षक मेथुल यादवको टोलीले उनीहरूलाई नियन्त्रणमा लिएको हो। जिल्ला अदालत सर्लाहीबाट पाँच दिनको म्याद थप गरी उनीहरूमाथि थप अनुसन्धान भइरहेको प्रहरीको भनाइ छ। घटनामा संलग्न अन्य व्यक्तिहरूको खोजी कार्य पनि तीव्र रूपमा अघि बढाइएको छ।