मोदी र ओलीको भेट: द्विपक्षीय सहकार्यका विषयमा महत्वपूर्ण छलफल

काठमाडौं, चैत २२ गते ।भारतका प्रधानमन्त्री नरेन्द्र मोदीले नेपालका प्रधानमन्त्री केपी शर्मा ओलीसँगको भेटलाई अत्यन्त फलदायी बताएका छन्। बिमस्टेक सम्मेलनको अवसरमा शुक्रबार बैंककमा भएका यस भेटघाटमा, मोदीले दुई देशको द्विपक्षीय सम्बन्धलाई प्रगाढ बनाउन महत्त्वपूर्ण छलफल भएको उल्लेख गरेका छन्। उनले उक्त भेटको बारेमा सामाजिक सञ्जाल ‘एक्स’ मार्फत जानकारी दिएका छन्।

मोदीले भारतले नेपालसँगको सम्बन्धलाई उच्च प्राथमिकतामा राखेको बताएका छन्। नेपाली भाषामा लेख्दै मोदीले भारत–नेपाल मित्रताका विविध पक्षहरूमा गहन छलफल भएको जनाएका छन्। विशेषगरी ऊर्जा, कनेक्टिभिटी, संस्कृति र डिजिटल प्रविधिका क्षेत्रमा द्विपक्षीय सहकार्यको सम्भावनामा कुराकानी भएको जानकारी दिइएको छ।

यसबाहेक, मोदीले विपद् व्यवस्थापन र समुद्री यातायातका क्षेत्रहरूमा पनि महत्त्वपूर्ण छलफल भएको बताएका छन्। यी क्षेत्रहरूमा भारत र नेपाल बीच थप सहकार्यको अवसरहरू खुलेको उल्लेख गर्दै मोदीले भविष्यमा यसका परिणामहरू सकारात्मक हुने विश्वास व्यक्त गरेका छन्।