बर्दिबासमा २३५ किलो गाँजासहित मिनी ट्रक चालक पक्राउ

जनकपुरधाम, चैत १९ गते ।  प्रहरीले बर्दिबास नगरपालिका-३ बाट २३५ किलो लागूऔषध गाँजासहित एक मिनी ट्रक र त्यसका चालकलाई नियन्त्रणमा लिएको छ। सोमबार साँझ ६:४५ बजे बिपी राजमार्गअन्तर्गत सिन्धुलीबाट बर्दिबासतर्फ आउँदै गरेको बागमती प्रदेश–०१–००६ ख ५३७१ नम्बरको निलो मिनी ट्रक जाँच गर्ने क्रममा ट्रकको हुडमा फल्स बटम बनाई कालो त्रिपालले छोपेर लुकाइएको अवस्थामा २० वटा पोकामा राखिएको गाँजा फेला परेको हो। इलाका प्रहरी कार्यालय बर्दिबास र लागूऔषध नियन्त्रण ब्युरो शाखा कार्यालय बर्दिबासको संयुक्त टोलीले बरामद गरेको लागूऔषधसँगै मिनी ट्रकका चालक, मकवानपुर थाहा नगरपालिका-७ डाँडाबासका २७ वर्षीय कबिराज गोलेलाई पक्राउ गरी अनुसन्धान अघि बढाइएको जिल्ला प्रहरी कार्यालय महोत्तरीले जनाएको छ।