रवि लामिछानेले सांसद पद निलम्बन फुकुवा गर्न पुनः आग्रह

काठमाडौं, चैत १९ गते ।  राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो सांसद पदको निलम्बन फुकुवा गर्न सभामुख देवराज घिमिरेलाई दोस्रो पटक आग्रह गरेका छन्। उनले यसअघि माघ १८ गते लिखित निवेदन दिएको स्मरण गराउँदै मंगलबार पुनः सिंहदरबारस्थित सभामुखको कार्यकक्षमा भेट गरी राजनीतिक प्रतिशोधका कारण आफूलाई सम्पत्ति शुद्धीकरणको मुद्दामा तानिएको जिकिर गरे। साथै, उनले राजनीतिक दलहरूसँग छलफल गरी आफ्नो निलम्बन फुकुवा गर्न सभामुखलाई अनुरोध गरे।

सभामुख घिमिरेसँगको भेटपछि सञ्चारकर्मीहरूसँग कुरा गर्दै लामिछानेले सरकारले पूर्वजहरूले कमाएको सम्पत्ति र वैवाहिक सम्बन्ध अघि श्रीमतीले आर्जन गरेको सम्पत्तिलाई आधार बनाई मुद्दा दर्ता गरेको आरोप लगाए। उनले यही कारण आफ्नो सांसद पद निलम्बन गरिएको दाबी गर्दै पुनर्विचार गर्न आग्रह गरे। सभामुख घिमिरेले पनि यस्तो मुद्दा राजनीतिक हतियार बन्न सक्ने चिन्तामा आफू रहेको उल्लेख गर्दै दलहरूसँग छलफल गर्ने आश्वासन दिएको लामिछानेले बताए। साथै, उनले संसद्सँग सम्बन्धित विषय संसद्बाटै समाधान हुनु पर्ने धारणा राख्दै अन्तिम विकल्प अदालत रहेको बताए।